› 選擇地區
三藩市
紐約
洛杉磯
其他美國地區
香港 台灣 北美
 
2005年03月08日

  不叫蔭權叫「實權」 - 李八方

董伯玩完,煲呔吹住口哨咁上位,點知突然由「國務委員」唐家璇率先官式宣布,下一任特首,只不過做兩年,人大護法許崇德,即時附和!
連日喺北京兩會期間密切活動嘅港區人大政協反曾聯盟,篤背脊大有斬獲!
據權威人士話,港區人大政協有一干勢力,誓阻煲呔上位,不惜在開會期間,走去搵江太祖方面力陳利害,終於成功將煲呔任期,由《基本法》所規定嘅五年,一咳就咳為兩年!
本來,壽爺嚴格控制劇本進度,直到今時今日,咪忘記廢董尚未正式遞信,亦未做到政協副主席!按照壽爺劇本進展,應該到十三號,廢董正式上神枱,跟住再宣布廢董辭職。由人大或其他執法機關宣布,係五年定兩年半!冇理由由唐家璇截胡打尖,搶先宣布!
唐某係江太祖心腹,呢一樣全國皆知!自從前年沙士,佢做咗運輸大隊長,押送抗沙士物資來深圳,親自由阿董來深圳跪領,以體現江太祖撐董隆恩之後,有好耐好耐,呢位超級唐唐,都一直冇蒲過頭LU!
好多人話,江太祖兩會冇現過身,係咪已經……嘿,估唔到我哋江太祖,好似部鬼子佬傳記所講,佢若然要發揮影響力,係毋須上台訓話嘅,只要攞起個電話就得嘞!

揸掃把變揸五指金耙
煲呔得番兩年,個局就好好睇!佢將會有冇實權?現時話到明,阿董嘅人肉地雷陣三司十一局原班人馬,基本上要照單啃晒。
跟住最關鍵,就係廢董身邊嘅心腹,有「董班子汪東興」之稱嘅人物(不屬三司十一局編制,若果煲呔有力,完全可以炒得之),係咪重留任,繼續貼身「協助」煲煲施政,而煲煲亦冇得揀,要焗住啃埋!
若然呢個問題嘅答案係Yes,咁煲煲就有少少位高勢危咯喎,淨係「蔭權」,係唔夠嘅,因為蔭吓蔭吓,就會陰乾,至緊要係改過個名,叫做「曾實權」!
不過,接近官場勢力人士話,煲煲雖只得兩年,但千祈咪睇低佢老哥嘅智慧,當年佢俾廢董人馬圍攻,叫佢揸掃把,佢揸吓揸吓,就喺澳門揸到壽爺嘅五指金耙!
現時土共老左,將「八萬五」大罪紛紛嫁禍畀煲煲,竟然話阿董主張「廢八萬五」,煲煲同陳太力阻,可見土共係幾咁憎恨!
真唔真?講番一件事,九七後抗擊大鱷,本來係曾蔭權嘅橋,親力督戰,任志剛配合,當年煲煲去搵廢董報告,廢董用咗半個鐘頭「深思熟慮」就批准,點解咁快?因為廢董不懂金融經濟,唔明煲呔講乜!
但係到咗廢董競選連任,抗擊大鱷,就竟然變咗廢董「十大功績」之一嘞!



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載