› 選擇地區
三藩市
紐約
洛杉磯
其他美國地區
香港 台灣 北美
 
2005年01月06日

  田少講明想抱孫 - 李八方

田少(左二)見乖仔(右三)娶到個好老婆,全日都笑到見牙唔見眼。
區民傑攝

自由黨主席田北俊噚日娶新抱,一對新人早上喺堅道明愛天主教座堂行禮,城中官商名流都畀足面出席,李嘉誠嘅愛將霍建寧、九倉吳光正、胡應湘公子胡文新、馮國綸、煲呔曾夫婦、唐英年、林瑞麟以及自由黨嘅黨友好似梁君彥、林健鋒同張宇人都嚟觀禮。
田少梗係好開心,重喺記者面前大讚新抱CherylWillson好叻,雖然佢唔識講廣東話,但係曾經喺北京做嘢,普通話非常好。田少位公子啟文今年三十一歲,畢業於美國康奈爾大學,即李登輝讀嗰間,田公子讀土木工程,新抱做寫字樓租務,兩個婚後當然會幫田少打理家族生意啦。
田少話,佢兩個由朋友介紹認識,拍咗兩、三年拖後步入教堂,田少好羨慕丁午壽同劉柔芬升咗級做爺爺嫲嫲,重講到出口話「恨抱孫」,叫對新人快啲生下一代,張宇人就笑田北辰榮升二叔公。
田少一家唔係教徒,多得煲呔太太幫手借教堂行禮,煲呔雖然坐咗喺較後排,坐咗一陣就走,但都算不記舊惡啦。田家噚晚喺君悅請飲,老董都有嚟賀佢(圖二),不過,撞正立法會開會,自由黨嘅議員就要分批去飲,唔敢擺空城計。


傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載