› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

  陳有慶力撐老董救災 - 李八方

南亞海嘯大災難過後,泰國布吉成為港人失蹤重災區,港府不斷派人過去當地搜尋失蹤者,布吉話細唔細,由一個海灘到另一個海灘,郁吓都要幾個鐘,不過老董都有知心友,知道自己唔熟門路,即時搵咗港區人大陳有慶幫手。陳有慶家族擁有泰國最大嘅銀行盤谷集團,度度都有分行,佢一收到保安局局長李少光電話,即刻聯絡布吉分行經理,幫港府派過去嘅支援人員搭路,安排交通同周轉資金等,真係唔話得。
陳有慶公子、行政立法兩會議員陳智思,事發時身在美國,收到朋友求助電話先知大件事,佢亦有叫布吉分行經理幫手搵失蹤香港人,個經理重帶咗一位港人返自己屋企住,發揮互助精神。
陳智思過完新年就返香港,噚日佢嘅家族公司、亞洲金融集團公布,委任醫管局前專業及公共事務總監高永文做獨立非執行董事,原來經沙士一役,陳智思好欣賞高永文有誠信,又識面對傳媒同公眾,所以一見佢宣布唔撈,即刻禮賢下士,等到高永文十二月三十一日正式約滿,噚日馬上公布有關消息。
(圖)陳有慶(右)同陳智思兩父子永遠都拍住上。



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載