› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

  商人政治家台灣有奇才 - 李八方

台灣元老辜振甫(圖),高齡八十九歲逝世,從此中台統一,又渺茫多兩分!
辜振甫係生意佬,不過,佢唔係靠炒股炒地皮發達,而係做鹽、做礦、水泥,係實業起家,而佢發咗達,亦唔係咁嗜好一擲萬金包女明星,帶啲女去巴黎狂掃貨,而係鍾意讀書,嗜好京劇!

特區冇政治人才
特區商人治港,治到烏厘單刀,一塌胡塗,特區嘅商人,唔識得玩政治,商人治港,經過實踐,證實瓜晒,香港嘅商界,原來根本冇政治人才!
之不過,辜振甫就唔同嘞!佢不但識搵銀,重係一名政治外交家!中台辜汪會談,就係由辜老擔任第一主角,論身家、輩份、學養,高過中方嘅汪道涵一籌!台灣真係多人才,喺生意佬之中,搵到一件辜振甫,都可以成為歷史人物!
香港特區呢一邊呢?淨係出咗一啲好似曾憲梓、朗尼陳、胡應湘、田少呀咁嘅貨色,一啲唔順意就發爛渣!唔玩殘香港經已係神迹,呢班友若果有辜振甫一成智慧,就唔會谷到壽爺溫寶哋面黑黑喇!
重有喎,辜老做咗台灣海基會董事長之後,佢聽足李登輝總統指揮,李總統叫佢行左,佢就行左,叫佢右佢就右,係一個忠臣兼第一流嘅CEO!默默工作,不搶風頭,唔會好似董班子嗰個行政會議咁,得閒就呢個出嚟發表兩句,嗰個屹個頭出嚟發噏風!做生意,辜振甫該做老細時,佢就係老細,搞政治,該做打工仔時,佢就係打工仔,角色永冇混淆,大丈夫能屈能伸,呢挺風骨,呢種人格,喺華人社會,搵多個都難!

九二共識一陣煙
所謂九二共識,就係辜振甫執行傳達!當時只不過話一個中國,各自表述,台灣咁建議,點知後來中國擺款,辜老一去,所謂九二共識,就梗係化為一陣煙喇!
蘇州過後冇船搭,人未死嗰陣,中方唔識把握機會,瓜咗嘞,自己先至怨笨,時機一失,永不回頭,滄海一聲笑,滔滔兩岸潮,辜董事長,安息吧!



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載