蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年12月06日

  凸顯港文化 市民早認同
  《獅子山下》列港歌 - 李八方

黃霑追思會喺政府大球場舉行,人山人海,兩大醫師包括醫管局前領導人梁智鴻,同埋為黃霑主理癌症醫療嘅嚴秉泉,秉持知識分子良心,悼念黃霑,同時強烈要求全港煙民戒煙,與煙草商一刀兩斷!
嚴秉泉醫生呼籲,為紀念霑叔,全港煙民至少戒煙一天,不過佢就冇講邊一日!八方認為,不如就將黃霑嘅忌辰,即是十一月二十四號,定為全港無煙日,及列為「文學音樂節」。
追思會十大嘉賓,經由大會嚴格篩選,由遺孀Winnie簽署批准,除咗兩位醫生,向煙草商發炮,另外重有民主之父李柱銘,高度讚揚黃霑做人,一世一個「真」字!
另外,佛學大師張立重勇,亦呼籲將《滄海一聲笑》正名為「特區區歌」,不過,基本法只係話特區有區徽,冇話到准有區歌,正如基本法冇話准許公投,咁設立區歌,同埋推行公投一樣,係咪即是違抗基本法兼分裂國土呢?

《滄海一聲笑》都未夠代表港人
不過好彩冇二十三條,香港嘅「港歌」,冇錯係應該有,不過就唔係《滄海一聲笑》,而係全港六百萬市民早已認同嘅《獅子山下》!因為只有呢一隻,先至可以凸顯香港文化性格身份,列為港歌,並加插在黃金新聞時段前,取代《心繫家國》,又或者至少先《獅子山下》,後《心繫家國》,咁先至對得住無限熱愛香港嘅鬼才大師!
黃霑追思會,十大嘉賓發言之後,最後播出一段黃霑生前獨白,佢感激:「香港人好熱愛我,畀分畀我好鬆手」,有如佢老人家現身追思會,親自答謝!呢一段,簡直係神來之筆,台下眾多嘉賓包括肥肥及葉麗儀等,無不落淚!追思會莊嚴、親切、有文化品味、一氣呵成、毫無甩轆、嚴謹高尚,完全襯得起瀟灑認真嘅霑叔,幕後領導人陳太、騷王大監製蕭潮順,同埋絕情谷才子倪震,應記一大功!
香港人團結自強,送別咗一位天才橫溢嘅戰友,收拾哀情,繼續上路!霑叔,請安息,香港人,唔會令您老人家失望!


傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載