蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年11月25日

好友悼念

李克勤

佢都係一個儍瓜
李克勤:「同霑叔食飯,佢大講人生觀,話好多人一生都不停工作,冇好好享受人生,佢都係其中一個儍瓜,到六十歲才領悟到,忙碌工作令佢失去太多享受的時間。之後我就平均分配時間畀工作、家人同身邊朋友,好似霑叔嘅歌詞『放開心中矛盾,理想一起去追』,要好似霑叔咁,令生命『歡樂要多於欷歔』先有意義。」克勤笑言讀書時,男同學都視霑叔的《不文集》為必讀課本,後來總搵佢簽名留念。」

歌曲影響全中國
汪明荃:「我都係今朝睇報紙先知,我今日都有打畀佢個囡囡詩詩(黃宇詩)。」她續說:「為咗紀念黃霑,我哋第一場演唱會會以佢嘅歌為主,當年佢寫畀我嗰首《勇敢的中國人》好好,重影響咗成個中國,有乜嘢示威同民運香港人都會唱。佢個人好樂觀而且重好有才華,佢個博士銜頭唔係用錢買返黎。而且佢對廣告界亦都好有名氣,當年佢就搵咗我、黃淑儀同李司棋三個花旦一齊拍咗個廣告。」

失去了良師益友
劉德華:「霑叔對於我亦師亦友,今日即係失去了一位良師,少了一個朋友。知道佢離開,心入面響了呢首歌『蒼天笑,紛紛世上潮,誰負誰勝出天知曉?』𠵱家佢脫離痛苦,我相信霑叔宜家喺天國『豪情仍在癡癡笑笑』,今日香港損失了一位前無古人,後無來者的樂壇教父。」華仔表示霑叔曾經於填詞上教了他不少:「最初霑叔鬧我填嘅詞文理不通,私底下畀了好多意見教我,到讚我愈寫愈好。」

相關新聞:黃霑時代的結束

為歌同徐克嗌交
有「一代鬼才」之稱的黃霑昨日凌晨病逝,無綫昨晚邀請了他生前好友沈殿霞、鄭丹瑞、譚詠麟、鍾鎮濤和黃百鳴等,出席節目《滄海一聲笑──笑別黃霑》,以懷念故友。施南生說:「徐克同佢好好朋友,佢係一個大情大性嘅人,對歷史文學有深厚認識,徐克好鍾意同佢傾偈,徐克拍《上海之夜》,霑叔幫佢作《晚風》,有一次我聽到佢哋嗌交,原來喺電話討論歌詞,重談論到國家大義,好認真。」

佢好大聲但良善
葉麗儀說:「我哋跟佢學嘢嘅時候,初初覺得佢好大聲、好直接,後尾發覺雖然佢大聲,但係好良善,佢教咗我好多嘢,尤其係唱歌嘅方法。」她續說:「我今日去到洛杉磯機場,一開電話就收到高志森嘅訊息,話我哋已經失去咗黃霑,我坐喺度喊,說話一句都講唔到。我哋除咗失去咗一個好朋友,香港重失去一個好作家,係香港一個好大損失。但係既然已經離開人世,大家惟有接受呢個事實。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載