› 選擇地區
三藩市
紐約
洛杉磯
其他美國地區
香港 台灣 北美
 
2004年05月30日

  唐唐接班人少年財爺誕生 - 李八方

一班參賽嘅學生都好有潛質做財爺,希望佢哋快高長大。 李潤芳攝

財爺唐英年被盛傳是下屆特首熱門人選,那麼下屆財爺又會係邊個?花旗銀行同《經濟日報》旗下經濟商學院好熱心幫唐唐搵接班人,近期搞咗個全港少年財爺選拔賽,噚日舉行頒獎禮。
《經濟日報》副社長石鏡泉同八方講,今次共有六十四間學校四百名師生組成一百一十五隊參賽,反應好熱烈。比賽題目係「香港啟德舊機場高效益發展方向」,高級組由拔萃男書院學生組成嘅DRIVE隊伍以「Aero City」奪冠,整個構思特別之處係利用熱氣球環遊維多利亞港,重畀人喺熱氣球上面影相做photocertificate賺多筆,果然生財有方!初級組冠軍就由聖馬可中學嘅哈雷彗星隊憑「主題公園」奪標,大前提係唔抄襲迪士尼。兩組冠軍各得一萬大元獎學金。
石Sir話,幾個得獎項目都包含「吃喝玩樂」四個後生仔比較關心嘅元素,但最難得係呢班學生會將通脹上升趨勢等風險管理計埋入成本預算內,難怪石Sir話:「等呢啲人(得獎者)去掌管香港財政,一定唔會有超支,只會有回撥。」八方喺度祝佢哋快高長大啦!

最好選埋少年名嘴
另一個頒獎嘉賓經濟發展及勞工局局長葉澍堃就話,自己係「舊一代嘅理財精英」,同新一代嘅分別係:佢嗰代學嘅係低風險高回報(但好難搵到),同埋低買高賣,佢覺得新一代叻過佢嗰代。葉局長又希望得獎嘅少年財爺,真係有興趣加入政府做財爺,重話最好有經濟局長選拔賽,咁自己就可以退休。但八方覺得,其實香港𠵱家最需要的可能係少年特首,或者少年名嘴選拔賽先至真!



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載