蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年04月02日
馬上成為壹會員

  何志平嗌口號反應快 - 李八方

每年三,四月就係各大慈善團體交職時間,八方噚日去咗東華甲申年就職禮,見到何志平局長(圖),早排佢老婆胡慧中提到連戰喺台灣大選失利,激動到差啲喊,八方問何局長點睇?佢初時口快快話陪佢一齊激動,不過即時兜番話「講笑!」重話吸收下人哋經驗。阿扁前幾日向全球宣布香港一國兩制失敗,重話唔想做第二個香港,何局長就話:「各人有各人講法啦,我哋自己喺香港就知道香港有好多優勢,好多嘢值得人哋驕傲同欣賞。」八方叫肥何講嘢可唔可以多少少實質,肥何即時吊高把聲吶喊:「我以香港為榮,我以香港為傲!」十足人大護法一樣好火氣。
正式卸任嘅上屆主席楊超成就話心情好好,過去一年喺沙士壓力下,依然籌到兩億幾元,非常滿意,最要多謝太太支持,同阿哥楊受成公司英皇,經常派歌手出席活動咁話。問佢舊年有乜難忘事?佢話:「舊年五月沙士高峯期,有一個退休老人家喺幾個親友陪同下,親自將一張一千萬港元嘅銀行本票交嚟總局,我親手接張支票都好感動,佢話唔想宣傳,唔想見報,我哋都祝福佢身體健康。」至於卸任後會否轉投其他慈善機構,佢就話:「一入東華,成世東華。」而蔡志明女兒蔡加敏繼續做總理,佢話去年探望老人院,見到啲老人家無依無靠,無親無故,都試過幾次落淚。



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載