› 選擇地區
三藩市
紐約
洛杉磯
其他美國地區
香港 台灣 北美
 
2004年04月02日

  解散政制事務局還公帑於民 - 李八方

特區繼續暗流洶湧。所謂嘅人大常委曾憲梓,突然一反常態,擺出一副慈祥面孔,好聲好氣安慰港人,話釋法毋須擔心,中央人民政府一定會盡量滿足香港人嘅願望咁講。
曾憲梓侮辱港人,一向當做家常便飯,其謾罵嘅用語,亦最為惡毒,重試過膽粗粗,用錯字眼,膽大包天,將胡溫形容為死老鼠㖭。今次突然轉性,估計同換腎嘅生理後遺症冇乜關係,而係收到上層指示,叫佢出嚟降吓溫。

釋法惡例陸續有來
就算中央人民政府之中,有人出於一番好意,一啖沙糖一啖屎,但親中愛國有個曾憲梓,即使係沙糖,都俾香港人當做係砒霜。中央人民政府既然決定咗釋法,一件係穢,兩件又係穢,由居港權問題開始,釋完又釋,將來乜都有得重新解釋。例如:香港保持資本主義現狀,五十年不變,五十年原來係由一九八五年簽署聯合聲明嗰日開始計,咁即是話最遲到咗二○三六年,香港就可以轉行共產福利制。
又例如老鄧話過:舞照跳、馬照跑、股照炒。「舞照跳」嘅跳舞範圍,亦可以由人大常委再次解釋為跳健康舞、中國古典舞、拉丁舞,並冇話到准跳的士高及舞廳嗰隻貼耳咀頸情慾滾熱舞。只係話准齋跳舞,冇話到跳完舞重准去酒店有下文。唔怪得警方最近旺角淫業大掃蕩,原來係特區政府主動配合人大釋法。
至於「馬照跑」,亦可以「釋」為只准齋跑馬,亦即國家只准繼續經營上水古洞村騎術學校,准跑馬,未必係准賭馬。而「股照炒」,只係話准炒國家紅籌股,冇話准炒滙豐太古等英殖民餘孽股;淨係准炒股,冇話准炒孖展同外幣。所以一開釋法惡例,日後陸續有來,教育工作者及道德團體,不妨多多向人大常委請願,要求對「舞照跳」三個字進行釋法,保障吓持雙程證來港我國北姑嘅婦女尊嚴。

近日公務員中環午膳最流行耳語,就係既然政制發展,權在中國政府,咁點解特區政府重保留政制事務局?林瑞麟人工四五百萬一年,國家既已表態講明:特區嘅政制,唔到特區話事,為開源節流,係咪首先應該解散本來就冇乜嘢做嘅政制事務局,遣散林公公,減番少少財赤?

直選係最佳報仇法
某啲新進親中傳媒報道話,中央人民政府想對付傳媒及名嘴,並且係軍委會會議層次發出指示,講到好似踎喺梳化後面偷聽返嚟咁似層層,名嘴黃毓民及鄭大班果然先後遭到恐嚇,可見消息甚準,真係有跟進行動。
鄭大班寫字樓被潑紅漆,紅色係革命顏色,咁就一定係愛國人士所為。大班話佢意興闌珊,唔通想封咪?以大班呢亭潮州佬性格,又點會咁易冚牌,出嚟直選咪係報仇嘅最佳方式囉。



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載