› 選擇地區
三藩市
紐約
洛杉磯
其他美國地區
香港 台灣 北美
 
2004年03月25日

  未向鄧公問米
  盲目保釣隨時做吳三桂 - 李八方

台灣總統大選未癲完,又輪到釣魚台爆煲。中國「民間」保釣首領童增,竟然帶頭破壞日中兩國人民友誼,表面上未經中央人民政府批准,私闖釣魚台插旗,重整色整水,話勘探地形水流,扮晒地質學家㖭!

盲動係違抗指示
童上釣魚台鬧事,特區絕大多數市民係愛國的,之不過喺當前特區文革所煽動嘅「愛國論」氣氛之下,唔知點樣作出條件反射至啱。胡溫兩會期間,明明冇講過話要將保釣愛國大業進行到底,冇得睇面色,亦即冇得揣摩中央人民政府嘅心意,尤其係日本仔重有幾千億日圓貸款借咗畀我國,日本又係我國最大投資者之一,特區土共愛國同胞,若然發出熱烈擁護童增搶佔釣魚台行動嘅情緒性狂吠,無意中做咗啲「損害國家利益」嘅事,刺激到小泉純一郎發惡,撤回對華經援貸款,咁就分分鐘變咗唔愛國兼叛國賣國,亦即支持大陸「民間」保釣,即是做咗漢奸。
好似解釋基本法咁,問吓鄧小平米,又得唔得呢?呀,死嘞,老鄧生前明明話過:釣魚台主權問題,應該擱置,留給子孫後代去解決。根據鄧公釣魚台政策嘅原意及精神,即是現時唔准觸動釣魚台,邊個搶繮,喺呢一代亂咁盲動,話釣魚台係中國領土,即是違抗鄧公指示,又係唔愛國!

加埋早一輪有傳言聲稱,中央人民政府準備修正對日外交政策,要有「對日新思維」,對日本仔,要講多啲愛心,講少啲民族仇恨。
憑種種迹象,童增呢亭人,違抗鄧小平講話原意,借保釣插旗為名,行破壞國家利益之實,危害國家穩定,保釣即是賣國,童增亦即吳三桂!

彈弓手愛國愛港
唔怪得連「愛國」一向不甘後人嘅特區政府,都唔敢表態,保釣行動屬於乜嘢「性質」,港人應該收到嘞。千祈唔好行差踏錯,借保釣行動嚟顛覆國家、挑撥中日人民友誼,要好似民建聯咁,上北京睇清楚面色,就自然會修改黨綱,將支持○七普選嘅「原則」刪除,彈弓手愛國愛港,咁先至對得住前保釣烈士陳毓祥在天之靈!


傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載