› 選擇地區
三藩市
紐約
洛杉磯
其他美國地區
香港 台灣 北美
 
2004年03月10日

  成立特區文革小組深化戰鬥 - 李八方

特區文革,愈玩愈有火,土共喺北京,雖然無法如願將胡溫擺上枱,綁上文革嘅戰車,向六百萬港人亂衝亂殺,但成功咁得到胡錦濤所發出嘅「積極評價香港嘅政制討論」。有心水清嘅人士話:阿胡呢句說話係對住廢董講,身旁重坐埋曾慶紅、唐家璇、吳儀等,六國大封相,阿胡咁講,即是代表中央人民政府統一立場:近來鄔曾梁等人對民主派嘅狂砌、砌得好啱,應該深化文革,將呢一場正義嘅鬥爭進行到底。

基本法當毛語錄
所以安民即時發難,響應胡總號召,搬出文革最流行嘅「血統論」,挖出李柱銘先父李彥和老將軍嘅屍骨出嚟狂鞭,土共見狀,更加收到,所以由李祖澤出面,宣布就算唔成立愛國審查機制,都要成立一個「基本法宣講團」,將部基本法,當做毛語錄,年年講、月月講、天天講,務求香港六百萬人,不分男女老幼、跛聾盲啞,一定要將基本法背熟,好似當年林彪副主席指示:學習毛主席著作,係全黨、全軍、全國人民嘅頭等任務,要向毛主席像,早請示、晚滙報。
「基本法宣講團」首先針對「治港班子」,土共有言:重點包括「各級法院法官」,即是話,啲英籍澳籍嘅鬼佬大法官,佢哋嘅思想長期抵制我哋炎黃子孫,熟讀基本法、愛中國,以後判親涉及中資嘅貪污案,都要以「愛國」為先,凡親被告係共產黨員或中資組織頭頭,要通通放人。
同樣愛國標準,當然亦適用於廉政公署,廉署頭目好知吓碇:舉凡任何貪污受賄案嘅舉報,若然發現當事人係本地中資或共產黨人士,若然廉署人員,對國家冇感情、對中華民族唔尊重,係都要落重手開快勞釘死,咁就即是對十三億中國人民嘅嚴重犯罪,將來會受到民族紀律制裁。
「基本法宣講團」,得個講字又點夠,若然受到民主派長毛等刁民頑抗抵制怎麼辦?梗係要將維園阿伯武裝起來,發給斬竹刀、木棍、長矛,成立「基本法赤衞隊」,由大紫荊獲得者楊光擔任大隊長,再配合某愛國中學日前在天水圍用刀仔拮人

梁「特首」任組長
而統籌文攻武衞嘅,就要再成立一個「特區文革小組」,由第三屆特首梁振英任組長,曾憲梓為第一副組長,鄔維庸為第二副組長,組員就包括安民、工聯會老愛國鄭耀棠、啱啱做完卵巢抗癌手術化悲憤為力量嘅譚惠珠、孝順仔何志平、同埋啱啱棄暗投明因反23條大罵葉劉「豬狗不如」一鋪成名嘅「豬狗講師」史Sir文鴻等,直接向胡溫滙報。
呢個雞棚一搭起,香港就會進入一個愛國嘅新時代。死鬼鄧小平話,治港者以文革愛國者為主體,「五十年不變」?好笑嘞。乜你竟然信過咩?返去大口環,一齊口擘擘咁學習基本法喇。



傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載