› 選擇地區
三藩市
紐約
洛杉磯
其他美國地區
香港 台灣 北美
 
2004年03月10日

僱員怕現身被拖強積金難追

被指久未有為僱員供強積金的茶餐廳,位於尖沙嘴柯士甸道114號。

有茶餐廳僱員被僱主拖欠供強積金逾一年,並已向積金局求助,該局亦已向僱主發出附加費通知書,但仍頑劣拒理。根據法例,僱員若要循法律途徑追討,須提供全面資料作證才可追回欠款;但僱員礙於怕遭「秋後算帳」失掉飯碗而不敢現身,令部份無良僱主窺準此弱點,欠供強積金,剝削僱員。

「成十幾個月冇供強積金,我哋打份工嘅,真係好擔心!向積金局求助,但隨時要我哋出面,咁分分鐘會冇咗份工,𠵱家真係唔知點算!」形容同事均敢怒不敢言的柯士甸道114號新發茶餐廳員工,跟記者談及公司欠供強積金多時,無不感擔憂。

「出聲驚冇咗份工」
有員工指出,他們從銀行方面得知,僱方已多月沒供款,部份已離職的亦一直未獲發還;他們曾向公司反映,奈何公司並沒理會、亦沒供回拖欠的款項。
無計可施下,他們向積金局求助,「我哋交出晒所有資料、又畀晒證明,而積金局又查得到呢間公司確實係拖欠供款;但佢哋又話要我哋出庭作證先可以追得到。積金局盡過力又點?僱主都唔理,仍然係咁。」
員工不滿道,「出聲就驚冇咗份工、唔出聲又追唔番啲血汗錢;我哋真係左右為難!」
有前員工向記者大吐苦水,茶餐廳內共有二十多名員工,幾乎所有員工的強積金供款均被僱主拖欠,分別由數個月至一年半不等。
「我哋一直喺度等,只係希望佢有朝一日可以幫我哋供番,但等到𠵱家,似乎真係難過登天!」

隨時「渣都冇得剩」
感求助無門的員工歎道,由於他們近日得悉該店到四月便租約期滿,他們擔心強積金隨時「渣都冇得剩」。
「大家搞咗咁耐,以為可以苦盡甘來;但最終若果我哋唔出庭,都可能追唔得番。啲僱主就係睇準我哋怕秋後算帳的心態嚟剝削我哋。」
本報曾聯絡新發茶餐廳,但直至截稿日前仍未收到任何回應。
強制性公積金計劃管理局發言人表示,積金局於今年一月接獲其中一名員工投訴,已即時展開調查,確定其僱主於2002年4月至2003年6月間,拖欠強積金供款14個月。積金局已向該名僱主發出相等欠供數額5%的附加費通知書,又派職員前往該茶餐廳作實地調查。
積金局亦準備入稟小額錢債審裁處,循民事途徑替投訴人追討欠款。

積金局考慮控僱主
有關法律行動須由個案當事人提供本身姓名及追討款項,因投訴人拒絕提供資料,令積金局至今仍未能採取進一步法律行動。積金局現正考慮向僱主採取檢控行動,以收阻嚇作用。 (○三○一○三一)

服務熱線
電話:29908288
傳真:23702192
電郵:sservice@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載