› 選擇地區
三藩市
紐約
洛杉磯
其他美國地區
香港 台灣 北美
 
2003年05月08日

  四位女高官令班男人好羞家 - 李八方

八方早前話捐出三千元退稅,收到多位讀者和議,於是四圍奔走,今日可說功德圓滿,因為終於有人帶頭成立基金幫助真正有需要的人。
但呢輪咁多人籌款,基金都有成五、六個,有兩個已經籌到二千萬。其中由林鄭月娥、李麗娟、羅范椒芬同陳馮富珍四位女高官率領嘅「護幼教育基金」睇嚟潛力最大,分分鐘勁過工商界嘅基金。其實原因亦不難明白。第一,公僕人強馬壯,有成十八萬人,如果平均一人捐一千大元,已經有一億八千萬,如果響應八方退稅三千,更不得了。
第二,以往好少有人會打公僕主意,都係時候由佢哋回饋社會,聊表寸心,你睇公務員事務局局長王永平咁爽手,一捐就捐十萬大元就知。
第三,老董同阿松當班公僕冇到咗好耐,亦係時候向佢哋展示吓實力,唔好以為唔出聲就好蝦啲。今次四美繞過體制以私人名義一舉贏到盡,班男人都好羞家。但反正老董做乜都慢半拍,問阿松攞錢又咁艱難,求人不如求己,咪赤膊上陣囉。

契媽開心頻噏錯
有咁多人支持,眾人契媽可能開心得滯,竟然將蒙先生講成馮先生,第一日佢口中嗰位姓馮嘅善長其實係信興嘅蒙民偉,佢的確捐出一百萬。不過,只係一半捐畀護幼,契媽又搞錯埋,算啦,冇人會怪佢。


傳真︰2623-9278
電郵︰pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載