› 選擇地區
三藩市
紐約
洛杉磯
其他美國地區
香港 台灣 北美
 
2003年01月19日

兩好市民捉賊釀混戰

搶手袋的越南籍匪徒被趕至警員按在地上,鎖上手銬拘捕,而協助擒賊的休班藍帽子警員(右),糾纏中手部受傷。 杜建彬攝

【本報訊】「我唔識功夫,以前未捉過賊,冇理由啲罪案喺我面前發生都唔幫手㗎!」一名送貨工人昨清晨在大角嘴街頭協助追捕搶手袋越南籍獨行賊,無辜被同是捉賊的市民「當賊辦」飽以老拳,終在一名休班警員協助下將賊人制服,首次捉賊的他與警員同受輕傷送院。

賊強搶手袋
二十五歲的好市民姓蘇,叫「阿洋」,他說每朝清晨六時許,駕駛客貨車到大角嘴晏架街一個食品工場外,將食品運到各區食肆。他事後透露活到二十多歲未嘗擒賊,今次只是盡好市民的責任。
昨清晨六時許,一名姓李(三十八歲)女子行經橡樹街與晏架街交界時,被獨行賊搶走手袋,賊人沿晏架街向大角嘴道方向逃走,女事主尾隨呼救。

無辜當賊辦
「當時我喺車尾上緊貨,心諗『冇理由罪案係我面前發生都唔幫手㗎!』立即幫手追囉!」阿洋憶述當時情況時一臉淡然。在他追賊期間,一名見義勇為金髮青年亦加入追捕。
「我追咗二百米追到大角嘴道一四七號後巷,同個賊相距四、五呎,大家都冇晒氣走唔郁,我『大』佢話『有本事就搵刀槍出嚟,如果唔係我會一直追你!』點知個賊講咗啲越南話跟住用手袋掟我,我衝前捉佢。」兩人糾纏期間,尾隨而至金髮青年加入戰團,但由於天黑關係誤會阿洋為賊,揮拳打他。
在三人扭作一團時,一名姓廖休班藍帽子警員剛駕車途經,立即停車衝入後巷表露身份,阿洋見有警員出現大叫:「呢個係賊佢搶嘢!」但賊人仍奮力反抗,休班警員上前協助,經兩分鐘糾纏,三人始能合力將姓李(二十一歲)賊人制服。

未學過功夫
混亂中,阿洋手臂被咬傷,而休班警員手部亦扭傷,金髮青年知道誤打好人後,靜悄悄地離去。
「我唔識功夫,以前未捉過賊,今次純粹自然反應!」阿洋表示未食過「夜粥」,由於較早前涉及一宗交通意外撞傷人,他可能會被停牌,希望今次「好心有好報」能「大步檻過」。
而協助捉賊休班警員,則提醒市民捉賊時需顧及本身安全,追入後巷可能很危險。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載