› 選擇地區
三藩市
紐約
洛杉磯
其他美國地區
香港 台灣 北美
 
2002年10月10日

  $1.8出貨 袋千五萬
  馬時亨聽見8號仔笑住走 - 李八方

經過一個悠長暑假,立法會噚日終於復會,難得見到咁多司長和局長同時出現,八方同班行家當然唔會放過機會同佢哋傾吓偈啦!相對好多局長開開心心四周圍去玩,馬時亨就因為細價股搞到成個大頭佛,只見佢成個人瘦晒,差唔多肚腩都冇埋。
記得肥馬上任之初,非常風騷,但係經此一役,肥馬幾乎變瘦馬!加上選擇性搵傳媒公開道歉,俾行家勁鬧,自此佢見到記者好似見鬼咁,成日運路行。八方同班行家噚日圍住佢問,係咪真係好驚記者呢?點知佢猛話:「唔係,點解驚你哋?你哋又唔會食人!」

俾人鬧當吸取教訓
咁又係,俾人鬧吓咪當吸取教訓囉。有位心水清嘅老友更醒起近日電盈跌到冇眼睇,慘到連一蚊都冇,咁肥馬因為入政府做官,六、七月被迫快快趣分批放晒手頭上七百七十四萬九千股「8號仔」,咁咪執番身彩!
點知肥馬一聽見有人提「8號仔」三個字,即刻走夾唔唞,不斷笑笑口、急急腳咁走落立法會條樓梯,真係頭也不擰回來。
梗係啦,肥馬六、七月沽清股票時,八號仔股價徘徊喺一蚊八毫二仙至一蚊八毫七仙左右,套現一千五百萬袋袋平安,帳面更「賺」咗六百幾萬,俾人抦吓算乜嘢呀!


傳真︰2623-9278
電郵︰politics@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載