› 選擇地區
三藩市
紐約
洛杉磯
其他美國地區
香港 台灣 北美
 
2002年09月02日

  淫賤友玩謝曾主席 - 李八方

中大嘅出位迎新營搞到滿城風雨,好彩備受指摘嘅搞手好快企出嚟道歉。噚日民建聯主席曾鈺成亦講起呢單新聞,希望盡快告一段落。
曾主席對班學生都好同情,因為佢回想三十幾年前自己喺港大,一樣俾人玩殘,「要論意淫、離譜,我哋嗰時都差不多咁犀利,我都係受害者!」
不過,對於自己到底點樣被玩,曾主席死都唔肯透露,只係話類似陳坤耀前日講嘅「要去女生宿舍偷內衣褲」。乜話?堂堂一黨之首、行會成員偷……曾主席即刻好緊張咁更正:「我係偷第啲正經嘢!」曾主席雖然口口聲聲話自己係受害者被玩,但表情睇得出,佢諗起當年學生歲月仍然好懷念。
佢更加話啲學生一時玩得癲啲,日後都未必唔讀書成材,好似佢哋當年迎新營好多玩到離晒譜同學,𠵱家一樣名成利就,成為社會棟樑。至於係邊啲人,曾主席亦好有口德唔講。八方所知,周梁、馬丁同黃宏發等人,都係曾主席同時期的港大校友,大家可以估下邊個玩得最癲?



傳真︰2623-9278
電郵︰politics@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載