【網上論壇】【我根本放唔低出面】 (還柙抗爭者 Condom仔)

更新時間 (HKT): 2020.01.14 23:52

各位香港人,手足:

呢封係來自壁屋懲教所嘅信,呢封信可能遲咗啲,但都希望你哋嘅聖誕同新年都過得好!其實我自己係希望聖誕同除夕大家都可以唞下,為嘅係想你哋可以係普天同慶嘅日子入面有快樂嘅回憶。真心唔想你哋係咁嘅日子都帶着痛苦、怨恨同悲傷去過,好想好想你哋可以開開心心咁過節。雖然唔知而家你哋點諗同有咩計劃,但係喺與世隔絕同只可以睇CCTVB嘅環境下生活嘅我係咁諗。節日對在囚人士嚟講可以話同普通日子冇分別,但你哋唔同,你哋可以選擇點樣過節,所以我真係希望你哋可以開開心心咁過節,當係忙裏偷閒、苦中作樂。

有兩個地方希望你哋可以記住,係壁屋同勵敬。除咗荔枝角,呢兩個地方都有手足。可能我哋人數冇LCK(荔枝角收押所)咁多,所以你哋之前搞聲援同「和你寫」都以LCK為主;有可能只係因為你哋冇我哋number啦,所以冇寄信畀我哋。點都好啦,我並唔係想怪你哋,我只係怕你哋會唔記得、甚至唔知道呢兩個地方有手足。在我立場,我唔係要人記住我係邊個,我亦相信冇一位手足希望人哋記住佢係邊個,但我哋只係怕你哋會唔記得我哋呢啲還柙人士,一班已經盡咗力嘅手足。

有一樣嘢希望大家知道,612真係幫咗我哋好多,無論係日用品、律師費定係保釋金,佢哋都幫到足。真係好多謝612同埋好多謝你哋咁多位嘅捐款,冇你哋都冇嗰八千幾萬!

最後,我想同你哋分享下我嘅感受。係PUCI(壁屋懲教所)入面係唔主張甚至唔畀講政治嘅。我入到嚟之後我同自己講,入咗嚟啦,冇嘢做到啦,當畀自己唞下啦,唔好諗咁多,係時候放低出面嘅事係入面好好咁過。因為兩個月前嘅PUCI手足數量真係少之又少,喺同我一齊生活嗰班人入面係0(PUCI有兩班還柙人士)。所以我一開始真係可以話冇提過政治嘢,而且呢度嘅人都唔太關注新聞,好少會睇83台(無綫新聞台)。

但有一次咁啱轉到83台,見到啲衝突畫面我嗰下真係忍唔住喊咗出嚟。本來我以為自己已經放低咗出面嘅事,但當我見到呢啲畫面會喊嘅時候,我就知道自己其實根本放唔低出面,好想再出一分力,但無奈地我已經冇能為力,咩都做唔到,仲孭住條高院charge。睇到啲衝突畫面,種種以前嘅經歷通通浮現返出嚟。唔知點解每次睇到呢啲畫面都會想喊同好頹,我諗大概係我放唔低吧。

點都好啦,以後嘅事靠你哋啦,要加油!我哋唔可以輸亦冇嘢可以輸,所以一定要贏!香港人加油!Fight for Freedom!Stand with Hong Kong!香港真係好靚,要好好守護香港,香港唔係中國!

(編按:此為工黨立法會議員張超雄收到被還柙手足的公開信,由張超雄代為投稿。如有意回信,請寄到「中區立法會道一號立法會綜合大樓1017室張超雄立法會議員辦事處」,註明回覆給哪位手足,以及留低電話號碼或其他聯絡方法,方便議辦跟進。)

一格照片,一個故事,Follow蘋果Instagram!
BannerBanner