【李八方online】觀塘素人區議員創意爆燈 寸爆警方執法不力

更新時間 (HKT): 2020.01.14 18:56

新一屆區議會由民主派執政,全城期待區政改革,觀塘區議會之前一開波即時要求煞停半億「小白象」音樂噴泉,雖然政府拒絕從善如流,民政事務總署表明照去馬,但無阻觀塘區議員繼續發揮創意改善政府工作。素人出身嘅秀茂坪北區議員鄧威文今日喺大會批評警方區內巡邏執法辦事不力時,短短幾分鐘就由東至九龍灣德福商場休班警執法爭議,西至7.21元朗事件再至屯門大媽事件,寸盡警方。

鄧威文話區內近期違法泊車問題嚴重,又唔見警方執法抄牌,建議警方不如好似鎮壓示威活動咁推出篤灰熱線,甚至好似派警棍畀休班警咁,派本「牛肉乾簿」畀休班警,放假抄埋牌,之後又話秀茂坪有位「歌王」幾年嚟經常喺區內,晚晚大聲唱歌,對居民造成滋擾,相信呢位歌王冇申請相關表演牌照,但又唔見警方處理?反而有警員同歌王搭晒膞頭,鄧揶揄話呢種關係「似曾相識」,就好似7.21警方同白衣人咁,最後佢怒爆成件事好似屯門大媽事件,搞足四、五年都解決唔到,「點解(警方)仲要加人工呢?」

鄧威文嘅建議好唔好?大家各自評斷,惟獨最後一句相信係唔少市民嘅心聲,其實呢位素人出身嘅區會新貴,創意唔止用於寸爆警方,佢喺討論撥款問題時都有獨到意見,好似講緊涉及80萬元撥款嘅賀歲粵劇活動咁吖,佢話以往當局推銷活動時都只係好簡單講句推廣文化活動,就咁一句當然係好事,但佢質疑活動如果係唱返舊粵劇劇目,例如帝女花,「實際上參加學生一百個都唔夠,就唔抵」,建議改用粵劇特朗普、甚至用韓國人氣組合防彈少年團歌曲改編咁話。

一格照片,一個故事,Follow蘋果Instagram!
BannerBanner