【瘋警橫行】爆粗嘲人權觀察員「返美國」 拎手機拍攝挑釁市民:陣間跑快啲!

更新時間 (HKT): 2019.12.08 21:10

民陣今日(8日)發起「國際人權日遊行」,遊行隊伍直至晚上仍未散去。而在中環德輔道中,有防暴警在行車道上築起防線,與示威者對峙,其間多次挑釁在場市民及阻礙記者採訪。有人權觀察員於路旁與警員理論,卻遭警員用粗口辱罵,喝道「返美國啦你」,更有警員一度用胡椒噴劑指嚇他。該觀察員嘆道:「(警員)近距離用胡椒噴霧指嚇人權觀察員同記者,侵犯人權,妨礙採訪自由。乜嘢叫做『香港警察』,乜嘢叫做『文明地方』?」

不久後,有「立場新聞」記者投訴被警察針對,被防暴警不斷用強光閃燈照射,妨礙採訪工作,「警員咁你即係針對啫?喺嗰度你又照,呢度你又照!」數名蒙面防暴警一擁而上,喝罵該記者並辯稱只是照射前面,不是照射該記者。

記者與警察理論期間,有警員以武力代替對話,用胡椒噴劑指嚇該記者,「我而家警告你退後,如果唔係就使用胡椒噴劑!」立場記者無奈問道:「我唔退,你係咪噴我先?」該警員隨即回答:「係!」其後傳媒聯絡隊步至,其他同袍見狀,便拉開情緒失控的警員,但防暴警依然用強光照向該記者。該立場記者相當不滿,質問警員「前線警員話我哋唔影暴徒,咁你哋問我哋同事攞咩片呢?」

此外,有蒙面防暴警用手機拍攝在場市民,又出言挑釁市民:「陣間跑快啲喇!」

一格照片,一個故事,Follow蘋果Instagram!
BannerBanner