【李八方online】政府高層互毆?政務司極速澄清:捏造無聊 網民:五大訴求唔見咁快回應

更新時間 (HKT): 2019.11.22 02:07

政府高層發生打鬥?政務司司長辦公室喺星期四晚突然出post,話有網上傳言引述張建宗,指政府高層發生打鬥。帖文形容有關內容「完全捏造,非常無聊」。究竟發生咩事呢?

原來網上討論區連登,星期四有巴打出文,話政務司司長張建宗「受訪」時炮轟鄭若驊同鄧炳強等人係特區政府嘅毒瘤。篇文直接引述張建宗話,行政會議經常發生矛盾,指現任警務處處長鄧炳強處理在其母校中大嘅行動時,「指揮得很不自在」,曾用水樽怒擲速龍警員,之後竟然俾至少10個不屑鄧炳強所為嘅人員群毆。鄭若驊就喺側邊拍手叫好咁話。

美國參眾兩院剛通過嘅《香港人權與民主法案》,喺篇文入面都有提及,鄭若驊仲諷刺林鄭話:「全級第一,明天我們的資產就要回家了。」林鄭之後就用木棍,亂棍暴打鄭若驊,手執警棍嘅鄧炳強仲在旁呐喊助威,身邊嘅官員對面前情景就話:「瘋了,瘋了,都已經瘋了。」

大家見到情節咁荒誕離奇,應該都知係潮文一篇,一笑置之算啦。點知政務司司長辦公室竟然隆重其事,即日夜晚出post澄清。唔少網民就都笑司長「潮文都當真」 ,亦都有人話本來唔知政府高層有「打鬥」,經司長宣傳先知道。

有網民就一語中的:「五大訴求又唔見你應得咁快。」其實政府要證明有人睇住連登帖文,不如直接回應網民「五大訴求」好過啦。

一格照片,一個故事,Follow蘋果Instagram!
BannerBanner