【李八方online】撐警文宣太陽從南邊升起 「go black you never go back」好尷尬

更新時間 (HKT): 2019.11.20 00:47

正所謂fake news無處不在,fact check係責之所在,八方見到網民post出嚟全彩色特刊,封面印住「諗掂未?香港未來……」幾隻字,背後嘅維港景色太平山後有一個唔知係日出定日落嘅太陽。雖然八方方向感麻麻,不過以做咗香港人咁多年嘅經驗,太陽由南邊升起確係唔太尋常,唔知設計班底唔係香港人,定係對選舉結果有咩暗示咁呢?

呢本特刊中心思想,離唔開批評近日示威活動充斥暴力,令香港籠罩住「黑色恐怖」,又歸咎泛民係暴力元兇,幾乎每頁都批評泛民,係運動嘅「大台」云云。

不過睇到封底先知,其他內容全部都係茄喱啡,雞乸咁大隻字黑底白字寫住「Once you go black, you never go back」,真係對黑衫人幾咁饑渴、對衝衝子英勇身影幾咁朝思暮想、呢半年嚟喺床上典咗幾多個千迴百轉先敢將慾念咁樣宣示出嚟。難怪有網民思疑設計者近來成日諗住水炮車,有人就好正面話句嘢係曲撐逆權運動,話試過有自由、有法治,梗唔想go back之類。八方思想單純,都唔明你哋啲網民噏乜,如果讀者睇完唔明,不妨齊齊問吓Google大神。

《文匯報》編輯部深夜出咗聲明割席,話本嘢唔係佢哋印同派,一切內容都同《文匯報》無關咁話。咁真正出版者係邊個呢?真係不得而知喇。

一格照片,一個故事,Follow蘋果Instagram!
BannerBanner