【李八方online】黃之鋒獲英國頒發人權獎:係國際社會對反修例手足嘅肯定

更新時間 (HKT): 2019.11.19 12:07

本港歷時5個多月嘅反修例抗爭,除咗堅守陣地嘅香港抗爭者,仲有唔少社運人士到各國游說,爭取國際社會認同。英國國會跨黨派小組公佈,向香港眾志秘書長黃之鋒頒發「西敏寺人權、人類生活及人類尊嚴獎」(Westminster Award for Human Rights, Human Life and Human Dignify ),表揚佢喺民主路上作出嘅貢獻。黃之鋒話個獎唔係頒畀佢個人,「係國際社會對(反修例風波中)香港手足嘅肯定」!

西敏寺獎係英國國會跨黨派小組所頒發嘅獎項,表揚喺爭取人權上有貢獻嘅人,首屆得獎者係流亡美國嘅中國維權律師陳光誠。評審之一嘅保守黨人權委員會主席布魯斯(Fiona Bruce)話,黃之鋒絕對值得獲獎(truly worthy recipient ),指之鋒先後因為堅持個人言論自由同香港人嘅集會自由,先後被囚以及剝奪參選權利,形容此舉蓄意違反《中英聯合聲明》嘅舉動絕對係悲劇。

黃之鋒就話,自己唔值得攞呢個獎,相信今次獲獎係英國認可香港人喺反修例運動中捍衛《中英聯合聲明》所保障嘅自由。佢又話,為防止中國進一步侵犯香港人嘅人權,呼籲英國採取具體措施,包括實施類似美國《香港人權與民主法案》,或者向BNO持有人授予公民身份,強調香港人會盡最後一口氣,保護心愛嘅城市。

黃之鋒之後亦同八方講,曾經向英國方面提議係頒獎畀「香港人」,但因為獎項必須頒畀個人所以就頒咗畀佢,佢強調,今次嘅榮譽係屬於運動入面嘅手足。

頒獎典禮將於12月12日舉行,不過黃之鋒因為涉嫌6.12圍堵警察總部被控煽惑他人、組織或參與未經批准集結而保釋中,能否出境領獎都係未知之數。由於佢今日下晝會出庭,到時就知可唔可以親身領獎。

一格照片,一個故事,Follow蘋果Instagram!
BannerBanner