› 選擇地區
三藩市
紐約
洛杉磯
其他美國地區
香港 台灣 北美
 
2018年07月03日

【科技●國際專欄】世盃睇波新技術
環迴角度睇球員英姿

世界盃打到十六強,時勢造英雄,每屆世界盃都有不少新星名字湧現,只是目前為止,今屆最紅的就是那個叫VAR的東西。

文:盤古目

今屆直播有4K HDR 極致畫面,4K反而次要,有HDR高動態範圍睇日波太陽曬住個鴛鴦色場時,真係和諧好多。咁都未算睇波最高境界,今屆比賽每場都起碼有33部攝影機射住,美國觀眾直情可以自選角度重播。

但更終極的睇波模式已在另一個球場實現。日本KDDI網絡示範了以VR環迴角度廣播睇波⋯⋯係棒球。同足球唔同,棒球比賽最關鍵在捕捉打手擊球一刻,VR廣播實際操作是用16個攝影機環繞列陣釘住打手,觀眾只要掃左掃右就可以自選VR環迴角度睇,此技術最重點其實在示範5G網絡,因為要做到實時VR,手機就要接收多個畫面訊號,今屆世界盃4K HDR 廣播一個畫面都要用35Mbps,都搞到now當機,多畫面廣播數據是可想而知的沉重。

呢個VR睇波方式真係有得搞,在直播時的樂趣性反而少,重播翻睇時至正,因為觀眾有機會用Matrix子彈時間方式左睇右睇硏究參詳球員形體姿態,快慢定格任玩,學術性又有,娛樂性又有,絶對會成為運動記錄未來大方向,日後睇NBA入樽、跳高等關鍵一刻,都可以一覽無遺。

當然,要在咁大個足球場實現的話,要用多幾多個鏡頭?第一步起碼可以先玩十二碼,又或龍門區中鏡,慢慢發展下去。其實球場上球員身上同個波都有追蹤器,現時用於記錄速度等資料,日後説不定可用於鏡頭追蹤,十足打機畫面咁玩。

畫面靚咗,角度多咗,場波一定好睇咗?個人最懷念都係1990美國世界盃,每隊旗幟鮮明,球員們有血有肉,性格鮮明貫徹始終,經典名字包括老將米拿、荷蘭三劍俠、哥倫比亞金毛獅王,十足十睇緊金庸射鵰;只是那些純粹年代,已一去不返。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載