蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年04月29日

冠蓋滿西環 居民獨憔悴|白告

2,747
建立時間 (HKT): 0429 18:00

以前去東京,會覺得當地地鐵規劃眼花撩亂,識得搭係好方便,但往往要喺告示板前三思,反觀返香港搭慣搭熟,就算唔係點對點,都係相當方便嘅交通工具,特別係永不壞車嘅優點。

今時今日,港鐵版圖愈開愈闊,到沙中線開埋,交錯嘅線路就愈來愈多,複雜程度同便利程度總算同國際接軌,於是的士嘅用武之地亦愈來愈少,所以上次有客搭的士去西環石塘咀,確實係令人喜出望外。

搭的士真係有啲講緣份,嗰次我買完嘢上返車,都未拎返開個暫停載客牌,咁啱有人特登行去車同欄杆之間嗰窄空間,越過車門走向後面落客嘅的士,我即係手動開門,先引返個客上車,過海去石塘咀。「而家好少人搭的士過嗰邊,好似多數都搭地鐵?」根據的士佬非正式統計,搭的士去鐵路站沿線嘅人係遠少於去鐵路唔到嘅,除咗每月鐵路例牌壞車時。「慣咗揸車同搭巴士,你唔講我都唔醒起,同埋都行得唔近。」對於一直居於鐵路沿線,唔習慣新地鐵嘅方便唔係我能夠理解嘅感覺。「多咗地鐵點都好啲嘅,始終方便啲丫,又唔怕塞車,而家香港揸車愈黎愈危險喇。」雖然我都想做多啲生意,但係無可否認鐵路發展係會方便咗。「方便咪麻煩囉,我先唔想咁方便。」

乘客嘅意見往往令我注意到平時無留意嘅思考死角,今晚睇黎又可以長知識,即刻問佢有咩根據,點解方便都唔好。「我哋喺度住咗咁耐,點唔方便都適應咗啦,我呀媽80歲人,搵兩蚊車搭都識得搭啱路嘅巴士,而家整條地鐵,反而要驚佢CUT我哋搭開啲車,又要適應過咪仲煩。」乘客唉聲嘆氣,我又再一次體會區議員聆聽市民意見嘅感覺。乘客繼續講佢哋心中嘅隱憂:「適應過都還好,最麻煩係多咗好多區外人黎,搞到啲嘢食貴晒,本來啲餐廳唔使等位㗎,以前就算有報紙雜誌介紹都唔會話好多人黎,而家一有人報,就算區內個個都知難食嘅,都要排隊等位。」乘客講嘅慘況都似曾相識,就好似描述緊成個香港嘅情況咁,不過今次蝗蟲角色變咗香港自己人。

作爲一個都鍾意喺假日四圍去嘅人,實在唔容易認同佢嘅講法:「咁有時啲人係一窩蜂得滯嘅,但係都係佢哋嘅自由丫,唔可能唔俾人去其他地區玩,或者限制入區嘅人數㗎。」「就係咁我哋先無奈,唯有假期一早出去或者死都唔出去囉。」同樣嘅說話,好早已經喺西貢、長州、大棠嘅居民口中聽過,隨住鐵路愈來愈方便,要講呢句說話嘅人相信會愈來愈多,或者到最後飽和咗,各自喺假期侵擾人哋嘅居住區,咪打和囉SUPER。

「前面地鐵站口落啦。」乘客講,望住香港大學站嘅閘口,究竟大學入面有無一科可以平衡到居民同遊客嘅利益呢?大家都係香港人,去慣咗自己去開嘅商場,難免想去其他區發掘唔同嘅特色嘢,同時又唔想自己住嘅區分變成旅客熱點,或者見嗰個區太多人就唔好趁墟去,自行調節入區嘅人數,唔知可唔可行呢?


專欄作者簡介:
白告
我的文字你的故事紅的車廂,我的你的紅的。
Facebook專頁:
https://www.facebook.com/lazytaxi

發掘更多身邊的小城故事,請LIKE 蘋地Facebook Page,並設定為「搶先看」:
https://fb.com/appledailyland/

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載