【花生蘋台】港澳辦話有「恐怖主義苗頭」 要香港學新疆式維穩?

更新時間 (HKT): 2019.08.14 00:02

港澳辦前日喺3星期內第3次開記招,首次以「恐怖主義苗頭」嚟形容近期反送中運動嘅趨勢。所謂「苗頭」,其實係小農社會嘅用語,主要用嚟描述種子播種後到發芽生長前嘅狀態,中國古代文人好早就用嚟形容事情嘅「端緒、預兆或因由」。而中共就好鍾意用「消滅於萌芽狀態」,嚟形容佢哋鏟除一切潛在威脅嘅手法。港澳辦依家講話香港出現「恐怖主義苗頭」,似係想安插緊啲罪名落香港反送中抗爭者身上,相信克警收到order會好快改口,兼且更加重手打壓示威活動,亦為北京介入香港「止暴制亂」鋪定路。

有時事評論員就爆料指,自雨傘運動後,有克警出身的保安局高層不時帶隊,到新疆同當地武警交流,除咗去睇「洗腦」再教育營外,重頭戲就係「觀摩」當地打擊恐怖主義活動嘅維穩手段。咁奇怪?新疆與香港,無論喺經濟、社會同文化層面,有好大差距喎,呢啲咁嘅交流活動,真係俾到香港嗰啲官員學到嘢?唔通北京真係想要將喺新疆用緊嘅高壓式穩維手段,搬嚟香港用?

不過話時話,內地近幾年以打擊恐怖主義名義,實施高壓式「維穩」管治,的確係從新疆開始。2014年4月30日,新疆烏魯木齊火車站發生恐怖襲擊,造成3死79傷。有傳,當日係仲未「永續稱帝」嘅習總在當地巡視嘅最後一日,有關疆獨分子企圖暗殺一說,更一度甚囂塵上。

事後,北京積極反恐,並且高調宣傳習總喺新疆巡視時所作出嘅指示:「對暴力恐怖活動,必須保持嚴打高壓態勢,先發制敵,露頭就打,打早、打小、打苗頭,以迅雷不及掩耳之勢、用鐵的手腕予以毀滅性打擊,堅決把暴力恐怖分子囂張氣焰打下去,以震懾敵人、鼓舞人民。」簡單啲講,用番中共慣常用語,就係「消滅於萌芽狀態」,而「打苗頭」之後亦不斷咁喺中共官方嘅宣傳中出現。跟住北京極速制定及審議《反恐法》,仲喺2015年12月由全國人大常委會通過。

前年2月,中共新疆自治區黨委書記陳全國,曾作出有關4點維穩要求,包括「警鐘長鳴不放鬆」、「堅決打好組合拳」、「改善民生聚民心」及「快速處置出重拳」。根據香港時事評論員劉細良嘅分析,若將呢啲手段搬嚟香港用,就係指做好情報、防預工作,軟硬兼施多方面打擊抗爭者,用經濟倒退、民生惡化等說法嚟恐嚇香港人,再用派錢大搞福利嚟箍實民心或搞分化,仲要重拳鎮暴,盡快將核心抗爭者定罪判刑以儆效尤。呢啲根本就係近日特區政府嘅所作所為,效果如何,大家有目共睹!

不過,睇番過去外媒對新疆嘅報道,呢啲所謂「維穩」嘅高壓手段層出不窮,但當地情勢似係越維越不穩定。早前更傳出新疆某處派出所警員,疑似因情緒失控,槍殺3人後再開槍自殺。有專家就指,北京官方高壓嘅統治方式,已經令當地官員嘅忍耐到達極限,一旦生活出現變動,往往導致悲劇發生。依家傳出北京邀請,香港官員去當地考察,係咪真係想喺香港搞咁高壓嘅管治?再諗深一層,「壓迫越大,反抗越大」,香港好學唔學,走去學新疆?係咪想靠害呢?

雖然《反恐法》現在不適用於香港,但喺2016年旺角騷亂後,有港區人大代表,曾建議將《反恐法》以基本法附件三方式納入香港法律,以適用於香港。會唔會再有人咁樣提出,大家應該密切注意。以中共過去做事嘅邏輯,港澳辦發言人嗰句「恐怖主義苗頭」,除咗係恐嚇外,相信會係為咗未來留有一手做定準備。嚟緊廣東公安廳同香港警察應該會喺反恐層面,有更多嘅交流同合作,相信會越做越公開。

北京怕出動解放軍太過敏感,但會唔會有可能透過粵港警務合作方式,派武警嚟港協助「止暴制亂」?大家唔好忘記,今年2月國務院公佈嘅《粵港澳大灣區發展規劃綱要》,有關深化社會治理方面嘅建議,其中有關警務合作,就曾被一些學者指,係為內地公安來港「深度融合區」執法埋下伏筆。近幾日,網上已不斷流傳多段影片,指喺深圳市有大批武警人員及防暴裝甲車集結,進行多次反恐及防暴演習,部份影片仲配以英文及繁體字,擺明係要畀香港人睇。喺不久將來,粵港澳會唔會有跨境嘅反恐防暴演習,真係好難講?一旦真係咁樣發生,呢個代價將會好大好大!

一格照片,一個故事,Follow蘋果Instagram!
BannerBanner