蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月11日

【爆相爆片】老鼠反轉apm闖food court 清潔阿姐出毛巾滅鼠

101,687
建立時間 (HKT): 1011 22:45

觀塘apm商場星期日晚飯時間,L2層嘅food court全場爆滿,食客鄭先生同朋友食食吓飯,突然聽到有人起哄,此起彼落嘅尖叫聲,又有細路仔嘅喊聲,鄭先生諗緊因乜事大家情緒咁高漲嘅時候,見到有個清潔姐姐攞住地拖一邊追一邊掃,就大概估到發生乜事嘞。果然,下一秒一隻老鼠就喺佢一步之內跑過。

大人細路嚇到有人企上凳,有人亂跑避開,姐姐繼續攞住地拖追打隻老鼠,結果另外兩個清潔姐姐加入幫手,結果其中一個姐姐好似用毛巾拍拍拍,終於拍死咗隻老鼠,旁邊另一個姐姐亦好快手,執起隻死老鼠條尾帶走。有人歡呼:「阿姐好英勇啊!」在場有人更拍手掌。

鄭先生話捉老鼠過程只係幾分鐘嘅事,佢話自己都驚睇到啲核突嘢,雖然老鼠好污糟,但作為食客唔想睇到姐姐喺佢面前打死佢,場面太殘忍,結果佢都冇胃口繼續食飯。佢覺得喺大型商場出現老鼠好難接受,「話香港好多老鼠係真㗎,香港衞生好差,最近先話香港出現全球第一宗由老鼠傳人嘅戊型肝炎個案,巿民好危險!」

apm服務處回覆稱,一向會協助各商戶定期進行防蟲滅鼠嘅預防性工作,星期日晚接到L2層嘅cookedDeli by city'super food court商戶通知有關事件之後,嗰晚即時安排承辦商進行詳細檢查,商戶亦都進行深層清潔消毒工作,並加強預防措施。

服務處相信今次係個別事件,會密切留意情況,提醒各商戶要加強清潔同預防措施,同埋向商戶提供積極協助,務求為顧客提供一個舒適同衞生嘅購物及消閒環境。

你敢爆,我敢獎! 立即WhatsApp《蘋果》24小時爆相爆片熱線致電:63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載