蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月12日

【爆相爆片】旺角鬧市長髮女單手攔貨車 究竟搞邊科?

189,528
建立時間 (HKT): 0912 22:45

【00:52】新增動新聞
任何時候都人車爭路嘅旺角鬧巿,噚日下晝上演踢拖女以身攔貨車事件。讀者吳先生前日路過旺角花園街同亞皆老街交界,先達廣場對開小巴站,見到有個女人喺過路處企喺一架貨車前面,一隻手捉住貨車左邊倒後鏡,着裙踢拖嘅女人仲起飛腳踢貨車車頭,大嗌:「報警呀!」

嗰個女人長頭髮幾乎及腰、紮住條馬尾,着一條黑白色花喱花碌好似臉譜圖案嘅連身裙、孭住一個有Hello Kitty樣嘅袋。當時好多途人過緊馬路都望吓佢做乜,有唔少人仲同吳先生一樣,攞手機出嚟圍住佢拍片㖭。亦都有男途人好心勸佢:「唔好玩喇,俾人告你㗎,阻住人哋條路!」但個女人似乎唔領情,但吳先生就話個女人有啲鄉音,聽唔清楚佢講乜,只係隱約聽到咩差佬......你行開啦咁樣。

後面啲車塞住晒行唔到,各位搵食嘅司機大佬梗係唔耐煩不停狂呠啦,亦有圍觀嘅路人鬧個女人:「你阻住成條街呀!」但佢依然企硬。俾佢攔住嗰架貨車嘅司機可能想褪位俾後面啲車爬頭,佢倒車,然後又見佢打電話。好快一架小巴首先駛出左轉亞皆老街,跟住第二部貨車嘅司機駛過個女人身邊嗰陣,停車開窗爆粗指住個女人嚟鬧,跟住先開車走,後面條車龍先至消散。

個女人依然捉住貨車倒後鏡,向途人叫喊:「見到差佬先講啦!」吳先生話聽其他途人講返,個女人聲稱俾嗰架貨車擦撞,所以攔住佢。警方表示,最初接報有女途人攔截車輛唔俾佢走,警員接報到達現場嘅時候,嗰名33歲姓孔嘅女子已經行返去行人路,而架貨車開走咗,冇辦法向貨車司機了解發生乜事,將案件列作投訴滋擾。

你敢爆,我敢獎! 立即WhatsApp《蘋果》24小時爆相爆片熱線 或致電:63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載