蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月29日

科大生𢱑200雞翼贊助甩底 老闆︰連一點點尊重都唔識

600,926
最後更新: 0829 22:20 / 建立時間 (HKT): 0829 21:03

【22:15】科大回應

大學迎新營又爆出「𢱑」贊助「甩底」事件,有科大生向西貢一間開業兩個月、以賣雞脾聞名的食店要求贊助迎新營食品,老闆本着幫助年輕人,又可將食品分享他人品嘗、大家開心的心態,應承供應200隻炸雞翼,今早提早開工準備,誰知學生最後僅WhatsApp老闆稱:「sorry」、「cancel」沒有按約定時間取食物,老闆氣憤又失望在fb吐苦水:「究竟應唔應該做好人呢?」

髀魔-雞髀第一店陳老闆向《蘋果》講述事件,約兩星期前一名自稱科大生青年到食店,向老闆遞上一份「2018-2019年度香港科技大學學生會冰川社三學生會迎新營贊助計劃書」,希望食店贊助他們雞脾小食,老闆指雞脾製作時間長,提議贊助200隻雞翼,約定今早10時半取貨。

老闆指青年禮貌麻麻,「一句多謝都冇,反而仲話可以幫到我哋小店喺科大做宣傳!」日前,該青年又指忘記取食品時間,再次向老闆查問。至今凌晨1、2時他WhatsApp老闆問可否提早至早上10時取食品。老闆當時已入睡,今早才看見訊息。食店原本中午12時才營業,老闆已特地提早回店炮製雞翼,10時07分完成已即時WhatsApp通知科大生,對方回覆:「ok。」

但一小時後對仍未現身,食店再聯絡他,他回覆不好意思,正安排人手;老闆直言當時已經有少少嬲,「你話趕我趕俾你,遲到有啲過份!」他再追問時,科大生僅以兩個WhatsApp回覆:「sorry」、「cancel」,更封鎖食店的WhatsApp。

大學生白白浪費食店一番心意,陳老闆不想浪費食物,最後將雞翼分享給隔離左右的街坊享用。老闆慨嘆不想令事件變成公審科大生,但難明現今部份年輕人「連一點點尊重、禮貌同珍惜都唔識。」他稱若科大生誠懇道歉他樂意接受。在老闆與《蘋果》傾談之後,晚上7時許,6、7名科大生包括負責與食店洽談的青年,到食店向老闆道歉,並謂他們「做錯咗,處理得好差」老闆接受他們的道歉,並表示不欲事件再發酵。

陳老闆稱,他們一行人好有誠意道歉,「我同佢哋講,年輕人做錯事我唔介意嘅,我亦都會原諒佢哋,因為佢哋真係好有誠意同我道歉!」他又說,最重要他們肯面對及承認錯誤。該班科大生指會在fb公開道歉。今次事件會否嚇怕老闆以後不敢再贊助迎新營?陳老闆表示,日後仍會繼續幫人,但會清楚了解對方組織及背景後才應承。

而網民亦看不過眼,食店fb有逾700個留言,「好過份」、「垃圾」、「家d所謂大學生真係唔多掂,基本尊重都唔識,讀書黎都無__用架喇。支持小店做好人個行為,你嘅食物對於有心搞活動但無資金嘅團體真係好有用,不過下次遇到一代d大學生, 而且係一開始已經態度麻麻嘅,真係唔洗俾面佢,趕走佢哋la!」

陳老闆謂,日後仍會繼續幫人,但會清楚了解對方組織及背景才應承。

科大發言表示,就有科大宿舍學生會向食店徵求贊助後失約事件,已向相關同學作出了解,有關成員承認於處理事件手法上有所不當,已於今晚偕同科大學生會主席親身前往相關店舖,向店主鄭重道歉。發言人續稱,科大有就學生會的迎新活動提供指引,提醒同學應時刻留意言行、尊重自己及他人,並注意社會對接受高等教育學生的期望和要求。

你敢爆,我敢獎! 立即WhatsApp《蘋果》24小時爆相爆片熱線致電:63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載