蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月16日

【美人計2之四】親人鬧美容妹吸血鬼 宅男終稱考慮報警

372,669
建立時間 (HKT): 0716 20:47

阿勇家人對於他陷入這段不能拖手卻不斷付錢的戀情,感到十分擔憂及憤怒,更批評女友Coco:「我覺得佢(阿勇)完全係提款機,Coco就係吸血鬼,揸乾佢囉。」一直未「醒」的阿勇直至受訪尾聲才承認,其實對女友「有七成懷疑,三成保留。」更指若得知Coco有外遇,會報警稱被騙財。

記者:李啟發 攝影:周子惇

阿勇沉迷與女友Coco的「神交之戀」,他透露,近一年來都很難受,至於一直不聽家人勸告,選擇相信女友,全因擔心失去對方。「唔開心囉,好多負能量……比如兩三晚唔覆機,都會亂諗嘢,唔知佢同邊個一齊。」有時Coco兩星期才覆一次,令他覺得「勁難頂囉,(會做乜)都係等,冇辦法,打俾佢又唔聽,留多幾個留言囉。」

女友如有外遇 阿勇:梗係會嬲

他透露,最近Coco連小事都會罵他,例如批評他行路步姿「飄忽」,令她「成日都要避開你(阿勇)」,又例如「上次食飯燒嘢食,佢擺滿食物喺燒烤爐,我見有空位,想夾生嘢落去,佢話『你唔知放晒野落去架咩,枉你仲讀過廚』」至於表弟則不會罵他,「佢笑下囉,(點笑?)恥笑呀,唔知呀。」

雖然他只提出拖手這種正常男女朋友行為,但Coco都會堅定地稱:「我係女仔嚟,身體係我嘅,我唔鍾意,唔俾逼囉。」阿勇形容,這段初戀關係「好飄忽」,若確認她另有男友,「梗係會嬲啦,因為我付出咗好多自己嘅薪水、時間、努力、青春,乜都俾佢。」

Coco承認以前做美容跑數

他又透露,自己心目中的男女朋友關係並非這樣,「一個禮拜起碼見兩次或者一次,一個月可能都起碼見四次啦,正常放假見吓面都好,就算佢個日唔得閒都好,咪改天。起碼會行吓街啦,去唔同地方,睇日落啦,或者去行吓山、遊吓船河、睇吓風景、搭吓車都好,順便睇埋電影啦、食晚飯啦、行吓海皮啦、睇夜景啦、正常係咁。要錫啦應該,適合嘅時間。」

阿勇家人KC指,全家人對事件感憤怒,強調:「一個男仔就一份工,每月都係得萬零蚊,撇徐俾家用,要攞一萬蚊去還女仔個卡數喎,個女仔一句多謝都冇口,你話有冇咁離譜嘅事。好明顯個女仔鍾意個死物,信用卡同埋錢。我覺得佢(阿勇)完全係提款機,Coco就係吸血鬼,搾乾佢囉。」

事實上,KC懷疑阿勇最初是墮入美容騙局,曾將一段Youtuber放蛇測試及分析美容騙局的錄音,傳送給阿勇聽,阿勇事後曾致電質問Coco。她承認以前要跑數,「上網識人,因為冇計,嗰時冇乜朋友,一定會玩嗰啲app」,但強調認識他之後已決心轉行,現為銷售員。

短短約10分鐘,阿勇便被說服,更稱:「其實我知道妳好好架,我啲皮膚係好差。」Coco又批評Youtuber放蛇的行為:「其實呢個世界上,你做啲咩,只要人哋不滿你,其實都可能會將你公開於世,然後鬧你。」

你敢爆,我敢獎!即Call《蘋果》24小時爆相爆片熱線 :63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載