蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月14日

【爆相爆片】九巴車長不滿乘客收音機聲浪「罷駛」 究竟啱定錯?

147,005
建立時間 (HKT): 0614 15:22

巴士車長俾乘客辱罵甚至打傷嘅事件,以往間唔中都發生,但噚晚(13日)9點幾,九巴就有位霸氣車長疑因為唔滿意有乘客開住部收音機嘈住佢揸車,結果佢發脾氣,將架巴士泊埋站之後就唔肯開車仿如「罷駛」,仲話自己唔怕炒魷魚。事件擾壤十分鐘,經過乘客多次要求車長先肯開番車,引起一場爭議。有工會代表認為車長處理手法或有不當之嫌,但其實以噪音騷擾車長除了可能影響行車安全,亦係違法行為,故希望車長及乘客可以互相體諒。

引起爭議嘅霸氣車長姓陳,當時揸住部42M九巴,由荃灣去緊青衣長亨邨。乘客李小姐坐喺上層,佢話部巴士差唔多到總站,但去到長發邨時就聽到車長喺樓下大叫:「熄咗部收音機佢!」李小姐話當時聽到收音機聲浪已調低了,但架巴士去到下一站即係曉峰園站時,車長仍繼續叫乘客熄咗部收音機,仲泊埋站5分鐘都唔肯開車。

李小姐走落樓下拍低經過,從片段所見,呢位車長一度叫乘客過車,轉搭下一部巴士,其間有乘客走前司機位拍攝,車長就叫乘客:「影清楚啲呀!」有男乘客唔滿意呢位車長咁嘅態度,就對車長講:「你分分鐘俾人炒魷魚㗎。」呢位車長呢個時候大大聲反駁:「我唔會㗎,你嘈住吖嘛,你嘈住司機揸車吖嘛!」有女乘客亦唔抵得車長,話:「咁人哋收咗聲啦,你開車啦司機!」

經過乘客多次要求,呢位車長終於肯開番車,但佢繼續好勞氣話:「講幾多次,當我聾㗎!」另一名女乘客此時忍唔住再話車長:「成車人㗎嘛司機,個個趕住返屋企食飯」,車長此時再還擊:「再嘈吖,我再停低呀!」結果全車乘客都唔敢再出聲,有乘客就細細聲講:「如果再刺激吓佢,唔知會點。」李小姐認為呢位車長態度好過份,若帶住呢啲情緒駕駛巴士好危險,亦令佢諗起早前大埔嘅九巴奪命大車禍。

不過咁記者翻查過資料後則發現,呢件事邊個啱邊個錯,唔一定係咁黑白分明,因為若為巴士車長在駕駛期間,乘客嚴重騷擾(包括聲浪)車長,其實已經係觸犯咗可以坐監的刑事罪,因《公共巴士服務規例》列明任何乘客不得故意阻礙或妨礙司機或任何獲授權的人,或故意分散司機注意力;如無合理辯解即屬犯罪,可罰款3,000元及監禁6個月。九巴的《乘客須知》亦列明「車長有權拒絕任何引致騷擾或構成危險性的人士登上或乘搭巴士。」

九巴職員權益工會理事長李國華則指,根據九巴相關規定,若乘客以噪音或其他形式滋擾車長或其他乘客,車長是有權要求把作出滋擾騷擾的乘客落車,或是報警處理。他解釋,車長駕駛巴士時若受噪音收音機聲浪騷擾致無法集中精神,可能會影響乘的安全,他認為若乘客希望聽收音機或手機影片,其實最好是使用耳筒,以免滋擾車長或其他乘客。

所以表面嚟睇,若乘客持續發出嘈音(如收音機聲浪)滋擾車長,車長有權報警及請該乘客落車,但若如報料人咁講,車長當時只係將巴士泊埋一邊仿如罷駛,車長做法亦確係唔啱。故李希望,無論是車長抑或係乘客都可以互相體諒,以和為貴。

你敢爆,我敢獎! 即Call《蘋果》24小時爆相爆片熱線63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載