蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月17日

【爆相爆片●動畫】好心乘客拾獲銀包玉墜交車長後財物離奇失蹤 新巴hea查惹不滿

156,514
最後更新: 0517 18:54 / 建立時間 (HKT): 0517 00:15

【18:54更新】新增動畫
【10:44更新】有自稱是涉事站長的姓張男子網上留言,承認銀包失蹤是他的失誤,向乘客及失主表示「最真誠的致歉」及會反省,他指願意承擔後果及外界批評,但強調自己絕非監守自盜。不過他嘆稱,已有心理準備最終可能會被公司解僱。有網民讚他肯承擔責任,但亦有人認為須查明銀包失蹤真相

好乘客拾遺不昧,竟換來一肚氣!市民何先生話,今個月8號凌晨佢同太太上咗一架N8P通宵新巴後,喺座位發現一個其他乘客遺下嘅小銀包,裡面有4個玉墜,誠實嘅何先生將銀包財物拍照及後交畀車長,請佢轉交站長以便尋找物主。點知其後佢跟進時,新巴職員竟然話站長「唔小心」唔見咗個銀包,仲一度話唔會再跟進件事,話何生鍾意嘅話可以自己報警。何先生唔滿意新巴hea查,嬲到爆炸,佢質疑新巴點解咁肯定單嘢冇可疑?點解財物交咗畀站長都可以離奇失蹤?何生希望新巴徹查事件,仲話佢唔排除會報警,只希望搵到真相。

搞到何先生一肚氣嘅呢件事,發生喺今個月8號凌晨零時30分左右,佢時喺柴灣開舖嘅喺樂軒臺巴士站等車,等新巴通宵線N8P嘅首班車(小西灣南灣半島開往灣仔再回頭嘅循環線),準備返筲箕灣寓所。當時落緊大雨,車站有幾個人等車。點知架N8P竟然飛站,何先生追到燈口位拍門,個車長先肯開門畀佢同太太上車,但兩個人已經畀雨淋濕咗,搞到一肚火,同司機一度起爭執。

何先生最終忍住度氣,坐低咗喺下層右邊第二排櫈,卻畀佢發現座位近窗口有一個黑色小銀包,相信係其他乘客不慎遺下嘅。何先生當時本來想就咁將個銀包交畀車長,但擔心涉及財物會有風險,所以先係逐一打開銀包三條拉鍊影咗幾張相,佢發現銀包裡面有百幾蚊,包括20蚊同50蚊紙,另外仲有4個玉墜,唔排除係老人家嘅銀包。當架N8P新巴抵達筲箕灣時,何生落車前將個銀包交畀車長,叮囑對方交畀站長以便搵番物主,對方當時答應咗。

但同一日(8日)日間何生起身後,都係有啲擔心,於是打咗去新巴熱線,一方面投訴飛站嘅事件,亦都同時詢問下失物(銀包)嘅情況,點知對方竟然一度答冇收過車長交出嘅失物,令何先生好驚訝,「點解個錢包可以不翼而飛?」。後來一位新巴主任打電話畀佢,講法有的唔同,對方話原來當日車長係有交銀包畀站長,但站長唔小心唔見咗個銀包。之但係個主任又話,唔小心遺失銀包唔等如有刑事,所以公司唔打算報警(註:後來新巴終報警),話何生喜歡嘅話可以自己報警。

何生接受唔到對方嘅解釋,佢認為究竟真係有人唔小心唔見咗銀包,抑或係有人中飽私囊,應該要徹底查清楚。因為呢件係乘客交畀新巴嘅財物,新巴應該要小心處理同尋找失主。對於銀包財物突然離奇失蹤,何生話:「我認為好嚴重,就好似我交咗證物去差館,差人話唔見咗證物咁」。佢仲話,如果新巴冇合理解釋,佢唔排除會自己報警。

《蘋果》向新巴查詢呢件事,新巴發言人唔肯詳細講事件始末及調查進展,只係話公司已經知悉事件,並已經報警處理。小記就覺得報警都係啱嘅,起碼交畀專業嘅阿sir去查,應該有助搵到真相,唔使引起不必要嘅猜疑。

你敢爆,我敢獎! 即Call《蘋果》24小時爆相爆片熱線63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載