蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月16日

【爆相爆片】不滿交警開咪叫入錶 Benz男喪鬧:除支槍隻揪

613,254
最後更新: 0516 18:36 / 建立時間 (HKT): 0516 00:25

【18:35】警方發言人表示,西九龍總區交通部人員於前日(14日)下午5時15分在旺角弼街巡邏期間,發現一輛私家車未有繳付停車收費錶的費用,經警員勸喻後,有關司機已繳付有關費用。警員亦發現該輛私家車的玻璃及車牌展示的形式違反法例的規定,警方稍後將向有關司機發出「欠妥車輛報告」。

「1 ON 1?係唔係隻揪隻咁解」呢個問題可能要請教Ben Sir先得。呢幾日網上就流傳咗一段短片,影到一個着藍色恤衫短褲嘅平治車主,懷疑泊車無入錶被交通警員開咪提醒要入錶 ,呢位車主居然好鬼勞氣,不斷用粗口鬧警察,仲口出狂言挑釁「除咗支槍隻揪」,嗰差人EQ都幾高,只係笑笑回應,當然無開波喇。但圍觀街坊睇唔過眼加入戰團幫口:「睇咗你好耐啦,揸BENZ就入錶啦」。噢…..睇真啲,原來部白色平治車牌係「1 ON 1」,唔通係有所暗示。

講番段大約3分鐘短片內容,時間係周一(14日)傍晚5點左右,地點旺角弼街69號對出半個鐘咪錶位。一開波就見到一個戴頭盔交通警員企係白色平治後面,同兩個人解釋緊較早前開咪叫入錶嘅嘢,但當中平治車主就好唔滿意大聲講:「啱啱泊好車啫咋嘛」,更爆粗鬧爆交通警員,又要求交警「禮貌啲」。有男街坊唔抵得平治男所為,出聲撐差人:「基本嘢嚟架嘛,泊錶位」,平治男好勞嘈回應:「你知唔知發生咩事啊?你有無睇到有冇入錶啊?」正義街坊即反駁,「睇咗你好耐啦,揸BENZ就入錶啦」。

佢地拗咗一陣,平治男又走去交警前叫囂「入咗30秒都唔夠,你咪抄囉,怕X啊?」交警笑笑口回應「唔使入,怕咩啫,唔好震,又震啦先生」。平治男即挑機「一係你除咗支槍隻揪啦」,交通警梗係無啋佢啦,最後平治司機講咗句「我等你抄無問題架」,片段隨即終止。到底平治最後有冇被抄牌呢?我地問過警方,佢地暫時就未有回覆。

《蘋果》為求真相噚日重返現場查探。有街坊爆料話,平治男喺係附近開舖頭賣電話卡,經常喺嗰頭出沒名叫「太子安」,都幾出名,但最為人熟識係成日將靚車泊係咪錶位,但「通常唔會入錶囉!」記者行行下,真係喺街頭撞到平治男,佢肯回應事件,但就唔肯上鏡。

平治男話當時啱啱泊車入錶位,但交通警竟然開咪喝令佢入錶,佢先㷫再落車同對方理論,又投訴交通警態度差咁話,至於最後佢有冇收到告票,係唔係成日泊錶位唔入錶等,平治男都避咗唔答。只係話自己反省過覺得自己都有唔啱。佢仲話嗰交通警稍後CALL埋2個上司到場,2上司禮貌幾好,最後因為佢㗎平治車窗玻璃顏色及車胎懷疑違規,警察就抄低佢身份證,同畀將驗車紙要求到運輸署驗車。

你敢爆,我敢獎! 即Call《蘋果》24小時爆相爆片熱線63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載