› 選擇地區
三藩市
紐約
洛杉磯
其他美國地區
香港 台灣 北美
 
2018年02月19日

【狗狗有情】克服坎坷走出狐獨 狗醫生Wesley慰藉人心

建立時間 (HKT): 0219 00:30

黑白毛髮,體型龐大的伯恩山犬Wesley,眼神帶點憂鬱,彷彿埋藏着兒時坎坷經歷的褪色碎片,原來小時候牠曾被困在暗無天日的非法繁殖場,活在狹窄鐵籠等待作為配種工具。幸好1歲多的時候,繁殖場被打擊掃蕩,牠被救出生天;更幸運是獲得愛心爆棚的「狗奴」領養回家,主人飼養的另一隻狗醫生兼狗教授Goldie更打開Wesley的心窗,成為牠的啟蒙老師,兩師徒並肩作戰撫慰人心。Goldie後來病逝,但Wesley繼承了師傅志願,繼續擔任狗醫生,治療每一個受創傷的心靈,撫平傷痛。

相關新聞:【狗狗有情】邊款狗隻唔做得狗醫生?

記者:張珮琪 潘婉玲 攝影:麥超億

Wesley今年4月便9歲,雄性,主人Florence將牠由愛協領回家之日:2011年4月22日當作牠的生辰,當時牠僅兩歲。Florence轉述昔日愛護動物協會人員指Wesley曾非常孤僻兼怕人,擔心未必適合領養,建議Florence帶同家中的雌性金毛尋回犬Goldie前往中心嘗試與牠相處,當時Goldie已是亞洲動物基金的狗醫生(Dr Dog)兼狗教授(Professor Paws)。「我記得當時Wesley匿埋喺房嘅角落,好驚好驚,Goldie走埋Wesley前面,用隻手拍下佢同佢講嘢,當然佢哋具體講乜嘢我哋唔知啦,講下講下,佢竟然起身跟我哋返屋企!」

相關新聞:【狗狗有情】導盲犬工作偉大 一生服務他人

回到家中,Florence花了約半年才令Wesley自願踏出家門。她指牠初時3個月自困廁所,大小二便、食飯都在廁所,她稍一不留神,牠甚至會吃自己的大便。令Florence更痛心的是,她發覺Wesley有先天性髖關節問題,且腳掌呈粉紅色,即是牠以往從未接觸過地面,更不懂落樓梯,顯然是在繁殖場被不人道對待的後遺症。Florence遂像教小朋友一樣重頭教起。

Florence第一隻飼養的愛犬Goldie亦居功不少,牠兩次將在街頭的Wesley安全帶回家。「Wesley每一次出街一定要有Goldie陪住,Goldie唔喺度佢唔敢周圍行。」有一次她帶Wesley落街散步,突然一架貨車在牠身邊經過,牠非常驚慌,任主人點拉都不肯回家,最後她唯有出「殺手鐧」,急召女傭帶Goldie落樓,「佢見到Goldie放鬆晒,條尾冇再下垂,慢慢跟住Goldie返屋企。」又一次,Wesley同樣被駛過車輛嚇倒,掙脫女傭跑走,Florence帶着Goldie四處尋找牠,最終見牠在走失的地方一動不動,「佢見到Goldie即刻起身,我諗佢唔係見到我起身,Goldie走埋去大家對舔!」Florence說。

經過1年的相處,Florence認為Wesley已有進步,「我發覺狗同人一樣,佢其實可以話係自閉症嘅狗,帶佢見多啲人,接觸多啲外界嘅事物,對佢有幫助。」加上Wesley天性馴品,於2012年中,Florence帶牠參加狗醫生計劃並通過考試,可以與Goldie一同出動,她稱:「對人、對Wesley係一個雙贏。」

狗醫生屬於心靈治療性質,通過探訪老人院、醫院等,讓長者、病人接觸狗隻,撫慰他們心靈。而狗教授顧名思義是教人,通常機構會安排狗教授去不同學校,教學生人與狗的分別,例如人的手叫hand, 狗叫paw,加強小朋友對狗的認識,教他們如何愛護動物。最初兩年狗醫生生涯,Wesley似乎仍有膽怯的時候,總是瑟縮一角,慢慢地才敢走出來讓受眾摸摸、梳毛。

直至2015年底,12歲半的Goldie不幸患癌,經歷三次手術頑抗,最終不敵癌魔離世,令Wesley一度陷入另一次低谷,Florence感覺牠又變回內向自閉。可幸低潮的日子總會過,Florence讓Wesley考取狗教授資格,延續Goldie的助人精神,繼續服務有需要人士。

除了寵物犬,Florence的家亦是導盲犬寄養家庭,現時家中除了Wesley,尚有收養的流浪狗Ellie及導盲犬BB Quentin。先後貴為7犬的主人,她坦言每次愛犬的離開總會傷心,但她不會放棄:「因為我覺得愛狗嘅人,唔可以因為一次狗狗走咗就唔再領養……傷心邊個唔會吖,我都會,但係點解你唔將你份愛延續落去呢?去幫助第二啲流浪狗呢?」她深信「你嘅耐心、對佢哋嘅關懷,其實狗狗係知道。」今年農曆狗年前夕,Wesley與另外三隻狗醫生又出動探訪特殊學校學童,聆聽小朋友講故事,他們見到狗醫生都非常興奮,熊抱式歡迎。探訪尾聲,狗醫生及狗主也不忘向大家拜年,祝各位:「身體健康,事事如意!」

你敢爆,我敢獎! 即Call《蘋果》24小時爆相爆片熱線63836568

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載