蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月13日

【短片】【加州風波】前董事王炳權四度稱:我係一個苦主

建立時間 (HKT): 0713 06:00

【17:00更新】王稱將股份賣給胞兄,原因是認為自己不懂管理,胞兄較適合,至於內地業務正有買接洽
【16:55】王自稱入股決定草率,聲稱被鄭家達及其老闆誤導
【16:51】王聲稱某些傳媒日日報道,令真正買家卻步
【16:47】王聲稱公司負債由「上一手帶落嚟」,買之前唔知咁多負債
【16:45】王炳權指自己只是投資者,真正管理公司的是前董事鄭家達,指自己是一名受害人,無轉移公司任何資產
【16:41】王炳權指白武士無誠意購買公司,更不斷抹黑公司
【16:39】王炳權指受誤導及欺詐而入股,之後發現公司千瘡百孔,曾作改革亦無法改變局面,接受家人建議賣出公司股份
【16:35】王炳權稱最近有報道不盡不實,指自己入股公司的5個月內,注資了7000-8000萬元,其間未直接或間接取走公司一分一毫


連鎖健身中心CaliforniaFITNESS,及同屬同一集團J.V.FitnessLtd的合共12間分店,昨凌晨起突然全線結業( http://bit.ly/29CcLf4 ),直至8月31日進行清盤聆訊為止。呈請公司的董事為健身中心集團前董事王炳權,他將於今日下午4時半,以個人名義在港島港麗酒店舉辦記者招待會,《蘋果》屆時將會進行直播。

該集團公司,早前遭前董事王炳權旗下的鎂燦科技工程有限公司申請清盤,法院今委任信永中和會計師事務所作臨時清盤人,而呈請人王炳權一方確認,現有3本港及1內地潛在買家,正商討買下J.V.FitnessLtd,各方並簽下保密協議,但商討仍屬初步。

過去多日,該健身中心屢傳出有欠租及欠薪問題,有立法會議員更估算,其收取的會費近10億元,昨日有員工擔心有人偽造賬目或挪用資金,遊行前往灣仔警察總部集體報案。

王炳權Q&A
記者問題1):屋企貼大字報欠債係咪清盤原因,近期銷售不良仲叫客人簽名,近呢幾月被健身教練要求簽名,點解有倒笠風險仲要人畀錢?
王炳權答案:無爭過人錢,係有人造謠言出嚟,我唔明有報章寫到不盡不實,而且以前由鄭家達叫我買之前,隱暪好多負債,我哋一直注資金錢想做返好,從來無諗執笠。

記者問題2):五月份賣畀王倫時,係咪有計劃自己清盤,如果想改革銷售手法,點解做老闆都叫唔停不良銷售手法?
王炳權答案:我係一個投資者,全權負責係鄭家達去做,所有事情係佢控制,我只係投資者,今年4月期間我被海關拉兩次協助調查,老婆係董事都畀人拉,我都好困擾,我只係投資者做生意,點解畀海關拉,屋企人叫將檔生意賣畀人,而王倫在內地有投資者有興趣,我決定賣畀佢,我唔想將件事糾纏落去,我係一個受害人,短短5個月無咗7千幾萬,我都係一個受害人。間公司以前不嬲唔係我管,4月拉咗後我去搵鄭家達問佢,但根本管唔到佢,不良銷售係上一手一路帶落嚟,佢哋做咗二十年根底,我幾個月點可以改變呢間公司呢?

記者問題3):有家人叫你唔做投資時,有無考慮正式結業,點解唔係安排客人退款,而係賣畀哥哥再去清盤,而你對不良銷售手法是否知情?
王炳權答案:我唔希望公司執笠,負債上一手帶落嚟,我幾個月點可以令資產流失。公司所有銷售全部由鄭家達控制,呢行係人都識佢,我係一個投資者,投資七千萬,責任做到足,亦無轉移任何資產。
我同你講下點買間公司,去年12月鄭家達搵我,問王生有無興趣投資健身界,我想同你一齊做呢間公司,我老闆唔理事㗎,身體唔好可能入醫院,跟住佢畀一份文件,12月15日要簽呢間公司,佢話現在有買家買,不斷催我簽,我誤信謠言倉卒用5千萬買呢間公司,其實我係一個真正受害人、苦主。

記者問題4):你話賣畀哥哥,佢同內地業務有關,意思係點?點解有問題仲要咁樣處理,賣俾哥哥去清盤?其實咁係咪係一個好方法,點解唔遣散員工正式結業?
王炳權答案:我買公司拎好多錢,客人的債務係上一手留低,我買時都唔知咁多負債。你話點解搵王倫,因為屋企困擾得好犀利,我老婆晚晚都瞓唔着,我都注資咁多錢,我都想搵一個買家,但某間公司抹黑我,有傳媒行業日日報道我哋公司,係咪有人畀錢,點解要日日報道我公司?搞到買家卻步,呢個係最大原因。本來有四間傾緊,但有傳媒日日去唱我哋,我唔知行家咩心態。我都注資二千幾萬,如果我執笠做咩再注資落去,買呢間公司全部鄭家達叫我搞,責任卸晒畀我,可能你可以話我蠢咗,我承認,但我有咩唔啱?

記者問題5):個人名義有無欠公司錢,例如鄭家達錢?有無解僱過鄭家達?
王炳權答案:我無欠佢錢,你去問佢有關不良銷售手法,佢發你脾氣,乜都唔答你,而我買入公司後,第一月加教練佣金一倍,由6至10%加至12%,營運開支大咗好多,佢完全未得公司同意去做。我無解僱鄭家達,但我同王倫講,佢搞到公司風雲四起,全部古靈精怪係佢叫人去做,畀人問我都唔知,呢5個月我搬過寫字樓,去執班員工,裝修黃埔,咁都搞咗四月,同時有人抹黑我哋公司,我唔知某公司係咪從執荀員工呀。

記者問題6):公司負債係咪外間所講欠債3億?當中包括乜嘢負債,而鄭家達邀請你入股時,點解倉卒決定,你當時無睇晒文件?
王炳權答:佢當時搵一間上巿公司俾律師睇,話要15日簽約,佢話王生王生,5千萬買咁多間好荀,我以投資者心態諗,如果幾千萬買咁大個集團返嚟,理論投資上都OK喎,我問有無負債,間公司做晒BT(資產負債表),佢話胡老闆有病,我買完公司後,胡同月18日喺澳洲被人控告操控股票巿場被判監,呢個局我係倉卒咗,全部都係畀鄭家達同佢老闆誤導。現在我同律師商量緊點搞,我20年前係頭五十名全世界永久會員,呢五個月我投資咁多錢,相比其他苦主,最苦主嗰個係我!
仲有,審計報告講呢間公司唔可以營運,當時審計報告未出,我睇少咗咗2張文件,到我今年3月請會計返嚟,加州高層全部跳船走晒,我都唔知咩事。

記者問題7):既然講到成個都係局,點解賣畀你哥哥?係咪想你哥哥受害,如你果一早知道有問題,點解唔結業,向員工交待及遣散員工?
王炳權答:我搵王倫,係我覺得唔適合做呢行生意,我同教練講想減少少人工,全部唔做生意,你諗下最高2個教練出30幾萬糧,你哋個個都可以轉行,整體開支嚟講,教練出糧一個月佔1800萬,公司一個月盈利得4千萬,租金店1千多萬萬.基本公司每個月都蝕本,審計報告話唔可以營運就係咁的意思。

記者問題8):外地賣盤情況係點?
王炳權答:星加坡分店係姓胡前董事持有,內地則有新買家傾緊,應該好快賣出。

想睇最新消息? 即時follow【現場-蘋果突發】 fb! http://fb.com/applecitycrime

追實城中突發大小事,即 like 蘋果【現場】FB!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載