【石棺藏屍案】睇漫畫抄橋搵外快 揭阿T天生自卑狂成魔之路

更新時間 (HKT): 2019.12.13 16:01

駭人聽聞的荃灣石棺藏屍案,由2016年揭發拖足3年,其間經歷疑犯着草台灣、法官急病解散陪審團等等,案件今日終作出裁決。在案中自認「大話王」、成立犯罪組織「There」的大魔頭曾祥欣(阿T)謀殺罪成,被判終身監禁。不過,原來他是個天生自卑狂,《蘋果》找到他多名好友和前女友,總結出阿T全因向一本漫畫「抄橋」做盡偷呃拐騙勾當,令他由小丑變身「快錢王」,最終為錢踏上殺人不歸路。

記者:郭美華 黃學潤 張軍 莊建鑫

「佢份人好低能、懶型!(有次)趁佢同女友傾電話,我哋就不停用公仔扑佢,好搞笑。」跟首被告曾祥欣相交逾10年的E臣稱,二人因為迷上同一款日本音樂街機Jubeat而在機舖認識,之後經常通宵「操機」成為好友,他更獲邀加入「There」成為第一代成員。

不過由於阿T身形矮小兼樣貌不出眾,因此缺乏自信,「佢得150厘米高,又哨牙,重度近視,所以好自卑,成日做啲小動作引人注意。」E臣透露,年輕時的阿T經常靠在朋輩間扮演小丑角色引人注目,更不時成為被戲弄對象,「打打吓機,佢會企喺電視前,我哋咪的起佢,除佢底褲,玩happy corner囉!」

根據法庭紀錄,現年30歲的曾祥欣被捕時自稱無業,對此E臣直言不足為奇,更稱過去10年間只見阿T到過一間錶行打工,但僅做了兩星期便辭職。其後阿T就遇上阿J(即死者張萬里),二人聲稱靠炒股搵錢,「佢同阿J輪更睇住個市,日頭J睇亞洲盤,夜晚就T睇歐美盤」。據E臣所知,阿T更自稱曾代購一批美國便服賺得第一桶金100萬元,但根據阿T庭上口供,實情是T藉開設公司為名,成功騙取一名大陸金主入股200萬元,與阿J各分100萬元,但其實從來沒有開過公司。

至於阿T的成魔之路,就要從一本漫畫講起。E臣稱阿T深受一本漫畫的理念影響,「(漫畫內容)講成班年輕人返工放工,一放工group埋一齊開party搵錢,佢一開始就說好想學金錢師咁,夜晚返工創業」。阿T遂開始靠「呃呃氹氹」為生,更成立聊天群組「There」與成員商討搵錢大計,而E臣亦有加入。

最初組織只有數人,包括一對在飛鏢場認識的情侶和阿J。而阿T則選址荃灣灰窰角街DAN6工廈單位,即案發現場作為「基地」。2015年9月他更獨自搬出來,由祖母一次過支付近一年租金租用該單位,跟該對情侶當室友,眾人間中聚在一起打牌和打機。

直至阿T認識次被告劉錫豪(阿豪)、第三被告張善恒(阿K)和小草,4人一起搵快錢,「搞speed party、speed dating,快閃派對,話一晚賺1萬、2萬!」當時他們租用一個空置單位舉辦「快閃派對」,提供酒水,男收費800元,女則酌量收錢,結果每次吸引40、50人參加。由於阿T都頗具生意頭腦,加上經常有幾件名牌傍身如LV褲、SUGARMAN鴨仔衫等,令阿豪和阿K對他產生崇拜感,決心追隨他,「佢(阿T)想扮大佬,想一team人起個圍爐,自己做策劃者,做最大嗰一位,叫組員做嘢,自己就攞功勞。」

其後E臣因工作忙碌甚少與T聯絡,直至2016年3月4日即案發當日凌晨1時許,突然收到阿K來電,「阿K平時好少打畀我,第一句說話『有個你好想見嘅人嚟咗。』」但當時E臣患上重感冒,吃了藥後昏昏欲睡,故未有理會;直至翌日起床,才發現凌晨4時許,K和T先後再致電給他。

雖然外間批評3名疑兇是冷血殺人魔,但作為認識他們的好友E臣則直言,至今仍不相信阿T夠膽殺人,「以前同佢去鬼屋玩都驚,點會夠膽殺人?」他不排除一切都可能是意外,發生了突發事件,3人在慌亂下才弄至今日的結果,但慶幸自己當晚感冒並無到場,「如果我真係上咗去,就攬炒喇!」

另一位同樣認識案中3名被告的唐景成則於2014年佔中運動時認識阿T,當時唐在深水埗黃金商場一間電子產品店當售貨員,他形容阿T性格奇怪,是名副其實的吹水王,「佢成日扮有錢,話有幾百億地皮傾緊,落到嚟呢樣嗰樣都話買啦買啦,但落嚟幾次只買過一次,其餘混吉多」。

雖然他跟3人並非好友,但感覺阿豪和阿K確實像極阿T的跟班,「有次,阿T帶阿豪、阿K落嚟舖頭介紹畀我識,話以後佢哋兩個會搵我買嘢,口脗成個大佬咁!」另一次,3人到其店後,「阿T叫佢哋企喺度等,佢哋真係戅居居等個幾兩個鐘,我覺得阿豪、K以佢為中心。」另有友人形容,阿K斯文乖仔,但性格慢熱,平日說話不多,讓人感覺有點陰沉。不過他十分崇拜阿T,即使阿T所講的說話很誇張,仍對他深信不疑。在單親家庭長大的阿K,更曾向友人提過想學阿T搵多些錢孝順媽媽,令媽媽有更好的生活。

唐景成早前亦曾被傳召上庭,全因3人着草前一日,到其店叫他協助打印入台證。他清楚記得,當日為2016年3月10日,「佢(T)一抽二袋話去旅行,好似同班朋友we wa咁,完全冇異樣」。當時他還心想:「咁有錢,拎起passport話走就走,真係爽。」惟7日後卻收到阿T長途電話,「佢好輕鬆話:『同你講啲嘢吖,我啪咗人,有冇三、四千蚊借嚟?』我話好窮,佢話:『得啦,我自己諗辦法啦。』語氣好輕鬆。」對於「朋友」(阿J)被殺害3人仍若無其事,唐直言感到心寒。

追實城中突發大小事,即 like 蘋果【現場】FB!
BannerBanner